उत्तराखण्डा जनता दगड़ि हि ना बल भाजपा क कार्यकतौं दगड़ि बि बडुु ध्वक्का च
उत्तराखण्ड क द्वी विधानसभा मंगलौर अर बदरीनाथ विधानसभाम उपचुनौ हूणिन। प्रदेश मा जनि उपचुनौ क तारिख तय ह्वे भाजपा न अपणा द्विया उमेदवारू क नौं क घोषणा कै द्यायी।
भाजपा न मंगलौर बिटि फरीदाबाद क रैवासी करतार भड़ाना तैं त बदरीनाथ सीट बिटि राजेन्द्र सिंह भण्डारी तैं टिकट द्यायी।
गढ़वाल मण्डल म बदरीनाथ सीट हि छायीं जै सीट पर कांग्रेस कु कब्जा छायीं पर लोकसभा चुनौ म भाजपा न इन्नु गणित कायी कि राजेन्द्र भण्डारी न बीच चुनौ म विधानसभा क सदस्यता बिटि इस्तीफा द्यायी अर कांग्रेस छोड़िकि भाजपा क खुचिल म बैठिग्येन। जै कारण से या सीट खाली ह्वे। त वखि हरिद्वार लोकसभा म औंण वलि विधानसभा मंगलौरा सीट वखका विधायक सरवत करीम अंसानी क म्वरण से खाली हूंयी छायीं।
जख कांग्रेस द्विया सीटु पर उमेदवार ख्वजणा गुणा-भाग म लगि च। वखि भाजपा न मंगलौर अर बदरीनाथ सीटु पर अपड़ा उमेदवारु घोषण कै याली।
मंगलौर सीट सदनि भाजपा खूणि एक चुनौती रायीं। प्रदेसा म अबि तक हूंया पांच चुनौ च मंगलौर सीट भाजपा न कबि बि नी जीति। मंगलौर सीट पर बसपा कु जादा कब्जा रायी अर एकदा या सीट कांग्रेसन बि जीत।
भाजपा न जौ द्विया नेता करतार सिंह भड़ाना अर राजेन्द्र भण्डारी तैं टिक द्यायी द्वियों न लोकसभा चुनौ से पैलि भाजपा कु हत्थ पकड़ि।
पैल्यक मंत्री करतार भड़ाना दलबदल का पुरणा खिल्वार छन। उन्न कबि कांग्रेस, कबि भाजपा त कखि बसपा अर रालोद की खूब नौणि खूब खयीं च। इतगै ना भडाना हौरि प्रदेसु बटि विधानसभा हि ना बल लोकसभाक चुनौ बि लड़िन।
त दूसर तरफां राजेन्द्र भण्डारी छन जौ लोकसभा चुनौ क बीच म कांग्रेस ही ना बल बदरीनाथ विधानसभा क रैवासियों दगड़ि बि ध्वका कायी। सिरफ अर सिरफ अपड़ा फैदा खूणि राजेन्द्र भण्डारी कांग्रेस छोड़ि अर भाजपा क खुचिल म जैकि बैठिग्यींन।
भाजपा न लोकसभा चुनौ हरियाण क विधायक अर मंत्री रैया करतार भड़ाना त बदरीनाथ बिटि कांग्रेसा विधायक राजेन्द्र सिंह भण्डारी तैं भाजपा सामिल कायी।
यखम सवाल पार्टी तैं छ्वोड़िकि दूसर पार्टी म जाणा कु नीं च। बडु सवाल यों च कि जब राजेन्द्र भण्डारी न विधानसभा क सदस्यता बिटि इस्तीफ दे द्यायी त ऊतैं तैं दूबरा उपचुनौ म टिकट किलै? दूसरु सवाल च मंगलौर सीट बिटि हरियाणा क विधायक अर मंत्री रैया करतार भड़ाना तैं उत्तराखण्ड बिटि टिकट किलै?
यखम सवाल भाजपा पर छन सिरफ अर सिरफ चुनौ जितणा खूणि या दलबदल राजनीति किलै अर कब तक? अर क्य भाजपा म अब चुनौ जितण वला उमेदवार नीं छन? जु वुथैं भैर बिटि उमेदवार मगौंण प्वड़णा छन। क्य यु उत्तराखण्डा जनता दगड़ि ठट्टा नीं च?
अब उपचुनौ म हार जीत कैकि हूंया पर राजेन्द्र भण्डारी अर भड़ाना तैं टिकट, उत्तराखण्डा रैवासियों दगड़ि हि ना बल भाजपा क कार्यकतौं दगड़ि बि भाजपा कु बडुु ध्वक्का च।