भोळ पाणि खतम ह्वे जालु , त जिन्दगि बि खतम ह्वे जाली : मुख्यमंत्री धामी

देरादूण। मुख्यमंत्री पुष्कर सिंह धामीन आज कालूवाला, डोईवाला म जल संरक्षण अभियान क जरिया डोईवाला विकाखण्ड म जौली नहरा छाल जल संरक्षण अर संर्वद्धन योजना कु लोकार्पण कायी। या योजना 3 करोड़ 80 लाख रुप्यौं क लागत से स्प्रिंग एंड रिवर रिजुविनेशन प्राधिकरण (सारा) न पूरि कायी।

ये मौका पर मुख्यमंत्रीन जल संरक्षण अभियान 2024 मार्गदर्शिका कु विमोचन बि कायी अर एक डाळु बि लगै।

मुख्यमंत्री न बोलि कि पाणि बचौंणा खूणि हम सब्यौं तैं मिलिकि कोसिस करण प्वाड़लि। यां खूणि सरकारै कोसिस अर लोगु मदत बौत जादा जरूरी च।

मुख्यमंत्री न बोलि कि उत्तराखण्ड म नौला, धारा, गदना अमूल्य संपदा च। उन्न बोलि हम सबि तैं या सौं लिंण प्वाड़लि की पाड़ कु पाणि अर पाड़ै जवानि प्रदेसा अर पाड़ काम अयां।

मुख्यमंत्री न बोलि कि जख पाणि बगदु रैंद वख की जिन्दगि म उज्यळु हि उज्यळु हूंद। पाणि बचौंणा क पहल तैं जिन्दगि से जुड़यूं बतै की मुख्यमंत्री न बोलि कि भोळ पाणि खतम ह्वे जालु, त जिन्दगि बि खतम ह्वे जाली। उन्न बोलि कि पाणि क खैरि सर्या दुन्या खूणि चुनौती बणि च। पाणि क स्रोत खळाखळ खतम हूंणा छन। उन्न बोलि सरकार त पाणि बचौंणा खूणि जागरुक च। जल संरक्षण सप्ताह कु मकसद सबि मनखियों तैं जल प्रबंधना बारम बतौंण च।

मुख्यमंत्री न बोलि कि प्रदेस सरकार पाणि बचौंणा खूणि बौत गंभीर च अर पाणि बचौंणा खूणि सबि विभागु तैं सामिल करै जाणु च। अर हमरि यीं कोसिस तैं हौरि तागत देंणा खूणि ‘सारा’ कु गठन करै ग्यायी। सारा न 500 पेयजल योजनाऔं अर 200 जल धारा तैं चिन्हित कायी। जौ तैं दूबरा ज्यूंदू करै जालु। उन्न बोल आज बांज डाळा खतम हूणा छन। अर बोण मा आग लगणा घटना बि जादा हूणि छन। मुख्यमंत्री न बोलि कि आण वलि हमरि पीढ़ि तैं पाणिक क्वीं दिक्कत ना हूयां या खूणि हमतैं खूब डाळा लगौंण प्वाड़ला।

मुख्यमंत्री न बोलि कि जौलीग्रांट बिटि कालूवाला तैं ज्वड़ण वलु बाटा बणौंणा कु काम लोक निर्माण विभाग करालु। उन्न बोलि बाबा कालूसिद्धा पिछनै सौंग नदी तैं पर्यटन स्थल बण्यें जालु। या से पैलि मुख्यमंत्री धामी न कालू सिद्ध मंदिर म पूजा कायी अर प्रदेसा रैवासी सबि राजि खुसी रैयां या कामना कायी।

कैबिनेट मंत्री महाराजन बोलि कि आज पाणि का स्रोत्र सुखणा छन। उन्न बोलि पाणि बचौंणा खूणि आज जै योजना कु लोकापर्ण ह्वे, यीं योजन न 6 हजार गौं वलो क पुंगड़ों तैं पाणि मिललु।

ऐ मौका पर डोईवाला विधायक बृज भूषण गैरोला, अपर मुख्य सचिव आनन्द बर्द्धन, सचिव शैलेश बगोली, डॉ. आर. राजेश कुमार, अपर मुख्य कार्यकारी अधिकारी सारा नीना ग्रेवाल अर वर्चुअल माध्यम से सबि जिलाधिकारी जुड़यां छायीं।