अजय टम्टा तैं केन्द्रीय मंत्री मण्डलम जगा, जातीय तालमेल कु गणित

अजय टम्टा तैं केन्द्र सरकार मा मंत्री बणै कि प्रधानमंत्री न उत्तराखण्ड तैं विकास नै फौंकुड़ लगिग्येन।

उत्तराखण्ड सब्यां पच्यां सीट जितणा बाद अनिल बलूनी, त्रिवेन्द्र सिंह रावत अर अजय भट्ट तिन्या मंत्री पदा दावेदार छायीं पर भाजपा न अल्मोड़ा बिटि तिसर दा चुनौ जितण वला सांसद अजय टम्टा तैं केन्द्रीय मंत्री मण्डल म जगा देकैकि सड़क परिवहन मंत्रालय म राज्य मंत्री क जिम्मेबरि ग्यायी।

अजय टम्टा तैं केन्द्रीय कैबिनेट मा जगा देकैकि भाजपा न उत्तराखण्डम जातीय तालमेल बणौंणा कु काम बि कायी। अर इन्नु कैकि भाजपा वु रैबार बि द्यायी की कुछ बि हूयां दलित बोट भाजपा क दगड़ु छोड़िकि की कखि हौरि नीं जाण चैंद।

अब जरा भाजपा क गणित तैं समझणा कोसिस करदौ। प्रदेस म अबि मुख्यमंत्री धामी कुमौ बिटि छन। त भाजपा प्रदेश अध्यक्ष गढ़वाल मण्डल बिटि छन।

पांच सांसद जु जीतिक अयां वु मा त्रिवेन््रद सिंह रावत अर माला राज्य लक्ष्मी शाह द्विया ठाकुर त अनिल बूलन अर अजय भट्ट बामण छन। राज्य सभाम महेन्द्र भट्ट बामण त कल्पना सैनी ओबीसी छन।

अब उत्तराखण्डा प्रदेसा बात करदौ त यख विधानसभा अध्यक्ष ऋतु खंडूडी बामण त कैबिनेट म सतपाल महाराज, डॉ. धनसिंह रावत ठाकुर त सुबोध उनियाल, गणेश जोशी, सौरभ बहुगुणा बामण छन। रेखा आर्य दलित अर प्रेमचन्द्र अग्रवाल वैश्य छन।

भाजपा न पच्यां सीट जरुर जितीन पर भाजपा तैं बोटु क बौत बडु नुकसान बि ह्वे। गढ़वाल सीट बिटि भाजपा तैं लगभग 2 लाख अर हरद्वार सीट पर भाजपा तैं पौने द्वी लाख बोटु कु नुकसान ह्वे। साख कैकि भाजपा तैं दलित बोटु कु हि नुकसान ह्वे। यीं यु बडु कारण च कि दलित बोट बैंक तैं बचौंणा खूणि भाजपा अजय टम्टा तैं केंद्रीय कैबिनेट म जगा द्यायी।
अब चुनौ दलित बोट कु हौरि नुकसान ना हूयां, इल्लै अजय टम्टा तैं केन्द्रीय कैबिनेट म जगा देकैकि भाजपन जाति गुणा-भाग कु तालमेल बणौंणा काम कायी।

खबर त इन्नि च कि दिल्लीक बड़ा नेताऔं मुख्यमंत्री धामी न ज्यूं का बात सूणि अर टम्टा तैं केन्द्रम मंत्री मण्डल जगा दिये ग्यायी।

अजय टम्टा तैं सड़क परिवहन मंत्रालय म राज्य मंत्री क जिम्मेबरि मिलणा बाद प्रदेसा लोगु क टक अजय टम्टा पर लगि ग्यायी अर या उमेद ह्वे ग्यायी की अब प्रदेसा सड़कियों क खराब हलात झट ठीक ह्वे जाली।