द्वी पय्या क गाड़ी म पिछनै बैठण वळो तैं हेलमेट अर चार पय्या गाड़ीम सीट बैल्ट लगौंणा ह्वे जरुरी
देरादूण। सचिवालय म राज्य सड़क सुरक्षा कोष प्रबंधन समिति क बैठक उर्यें ग्यायी बैठक म मुख्यम सचिव राधा रतूड़ी द्वी पय्या गाड़ी म पिछनै बैठण वळो तैं हेलमेट अर चार पय्यौं गाड़ीम सीट बैल्ट लगौंणा कु नियम तैं लागू करणा निर्देश दींन।
मुख्य सचिव न परिवहन विभाग तैं प्रदेस मा हूंणि सड़क दुर्घटनाऔं क बाद हूंण वळा डेथ ऑडिट म कर्यां कामु क जाणकारी बि मांगि। यांका दगड़ि उन्न पूरि तरौं फेसलेस चालान सिस्टम तैं बि लागू करणा निर्देश दींन।
मुख्यम सचिवन सर्या प्रदेसा केर (सीमा) अर सबि बाटौं म एएनपीआर कैमरौं दगड़ि सैरुम (शहर) ड्रोन कैमरा लगैकि ट्रैफिक बन्दबस्त अर चालान करणा दगड़ि स्कुलुम एक दिन बच्चौं तैं सड़क सुरक्षा बारम बतौंणाक निर्देश बि दींन।
मुख्य सचिवन सबि 13 जिलों मा ड्रोन कु बन्दबस्त , टैªफिक लैट तैं एएनपीआर अर आरएलवीडी सिस्टम से इंटिग्रेट अर अपडेट करणा, कैमरौं क दगड़ि राडार स्पीट साइन बोर्ड अर हौरि आधुनिकतम टेक्नॉलाजी सिस्टम तैं लागू करणा खूणि वित्तीय मंजूरि बि द्यायी।
मुख्य सचिवन जीरो एक्सीडेंट प्रदेसा विजन क दगड़ि काम करण खूणि बोलि अर परिवहन अर पुलिस विभाग तैं सड़क सुरक्षा अर यातायात जागरुकता खूणि जादा से जादा सोशल मीडिया क जरिया लोगु तैं बतौंणा क निर्देश बि दींन।
बैठक म मुख्य सचिवन हिट एंड रन अर गुड समेरिटन कु प्रचार-प्रसार करणा निर्देश बि दींन। उन्न प्रदेसा सबि बाटों पर वैज्ञानिक तरिकौंन गति सीमा तय करणा क् कार्ययोजना पर झट काम करणा निर्देश बि दींन।
ऐ बैठक मा पुलिस महानिदेशक अभिनव कुमार, प्रमुख सचिव रमेश कुमार सुधांशु, सचिव अरविन्द सिंह ह्यांकी, श्री वी षणमुगम अर अधिकारी छायीं।