एनडीए सरकार चलौंणु अर पचाणु मोदी क् बसै बात नीं च

2024 लोकसभा चुनौ मा भाजपा तैं सबसे जादा सीट मिलिन। यांका बाद बि भाजपा खूणि सबि कुछ ठीक नीं च। 2014 म जब भाजपा सरकार बणि त भाजपा तैं 283 सीट मिलिन छायीं। अर ब्वलें ग्यायी कि अब देस तैं कटकुटि सरकार चैंणी च। साल 2019 सा लोकसभा चुनौ म एनडीए तैं कुल 353 सीट मिलिन। जैमा भाजपा ने 303 सीट भाजपा तैं मिलिन।

साल 2019 लोकसभा चुनौ अर 2024 सा लोकसभा चुनौम फरक यौं च की भाजपा तैं 63 सीटु कु नुकसान ह्वे। जै कारण से भाजपा अपणु दम पर बहुमत पौंण से बौत दूर रै ग्यायी।

यां से साफ च की अब भाजपा तैं सरकार बणौंणा खूंणि पूरि तरों अपणा सहयोगी दलु भरासु रैंण प्वाड़लु। ये लोकसभा चुनौ म भारतीय जनता पार्टी क एनडीए गठबंधन तैं 292 सीट मिलिन। चुनौ म भाजपा तैं 63 सीटु कु नुकसान ह्वे। इतगा हि ना भाजपा तैं पिछल लोकसभा चुनौ म 37.3 प्रतिशत बोट मिला छायीं त 2024 लोकसभा चुनौ मा भाजपा कु मत प्रतिशत 36.6 ह्वेग्ये।

यीं कारण च कि द्वि दा खळाखळ अपणा दम पर पूर्ण बहुमता सरकार चलौंण वला प्रधानमंत्री मोदी तैं अब अपणा घटक दलु कु भरोसु पर सरकार चलौंण प्वाड़लि।

इन्न मा साफ च कि साल 2014 म ‘भाजपा सरकार’, अर साल 2019 बिटि 2014 तक ‘मोदी सरकार’ चलौंण वला मोदी अब 2024 म एनडीए सरकार चलौंणा खूणि मजबूर छन।
मोदी तैं अब चंद्रबाबू नायडू अर नीतीश क ठंगरु पर खड़ी सरकार चलौंण प्वाड़लि। यीं द्विया राजनीति का इन्ना खिल्वार छन कि जौंकि अलग राजनीति सोचा च, अर द्वीया अपण मतलबा अर अपणु फैदा राजनीति करदन। नीतीश कुमार त कब अपणु रंग बदलि करदन सबि जणदा छन।

240 सीट क्वीं खराब नीं छन। पर चबळाट मा मोदीन ‘अबकी बार 400 पार’, ‘ये मोदी की गारन्टी है’, बोलि-बोलि कि अपणा खुट्टौं मा अप्फि कुल्हणु मारि। आज जब भाजपा तैं पूरू बहुमत नीं मिलि त या भाजपा की ना बल सिरफ अर सिरफ मोदी क हार च। किलैकि सर्या लोकसभा चुनौम मोदीन “तुमरु बोट मोदी खूणि च” बोलि कि बोट मंगिन। यीं कारण च कि भाजपा 240 सीट जितणा बाद बि खुस नीं च। अर अब ‘मोदी है तो मुमकिन है’, ‘आयेगा तो मोदी ही’ ब्वन वलों का गुच्च बन्द छन, अर यां पर अब पूर्ण विराम बि लगि जाण चैंद।

अपणा राजनैतिक जिन्दगि पैलि बार इन्नु होलु की मोदी की कुर्सी नीतीश कुमार अर चद्रबाबू नायडू क ज्यूड़ौं न बंध्यां ठंगरु पर खड़ी राली। तीन दा मुख्यमंत्री अर द्वि दा प्रधानमंत्री मोदीन अपणि पूरि तागतन राज कायी। अर अब अचाणचक मोदी खूणि गठबंधन राजनीति एक नै चुनौती बणिग्ये।

यीं कारण अब 10 साल बाद (2014 बिटि एनडीए सरकार चलौंणा बाद) अब न ‘भाजपा सरकार’ होलि अर न ‘मोदी सरकार’ होलि। 2024 म एनडीए सरकार होलि। अर यु सच पचाणु मोदी क् बसै बात नीं च।

आखिर ये चुनौ मा या बात साबित ह्वे की मोदीक जनता अर सरकार तैं अपणा ढंग चलौंणा कोसिस, जनता तैं रास नीं च। दूसरू ऐ चुनौ न यु रैबार द्यायी बि देस मा गठबंधना राजनीति अबि खतम नीं ह्वे।