यमुनोत्री, पैदल बाटा धारा 144 लगै ग्यायी

UK Dinmaan

उत्तरकाशी। यमुनोत्री धाम मा पैदल जाता बाटा मा जातरियौं औंण जाण मा क्वीं दिक्कत न हूंया यां खूणि जिलाधिकारी मेहरबान सिंह बिष्टन दंड प्रक्रिया संहिता क धारा 144 क जरिया आदेश जारी कै द्यायी। ऐ आदेशनुसार जानकी चट्टी बिटि यमुनोत्री तक ध्वाड़ा खच्चर अर डंडी आण-जाणा क् संख्या अर बगत तय करै जालु। ऐ बारम उप जिलाधिकारी, बड़कोट पुलिस उपाधीक्षक, बड़कोट अर अपर मुख्य अधिकारी, जिला पंचायत उत्तरकाशी क रिपोर्ट म यमुनोत्री धामा बाटु तैं कुच्यारु (तंग) बतै ग्ये जै बाटा मा जानमाल कु खतरा च। जै तैं देखिकि जिलाधिकारी न यमुनोत्री धामा बाटा म जातरा तैं सजिलु करणा खूणि जानकी चट्टी बिटि यमुनोत्री आण-जाण वला बाटु म ध्वड़ा-खच्चरु क संख्या तय कै दे। ध्वड़ा-खच्चरु क् संख्या 800 अर बगत सुबेर 4 बजि बिटि 5 बजि व्यखुनी दा तक तय करै ग्यायी। आदेश मा ब्वलें ग्यायी कि 5 घण्टा से जादा क्वीं बि ध्वाड़ा-खच्चर जातरा बाटु म नीं रालु।

जानकी चट्टी बटि यमुनोत्री आण-जाण वला डंडी क सख्या 300 तक करै ग्यायी। डंडी कु बगत सुबेर 4 बजि बिटि 4 बजि व्यखुनी दा तय करै ग्यायी। जातरा बाटा म डंडी आण-जाण कु बगत 6 घण्टा तक करै ग्यायी। अर यु तैं पचास-पचास कैकि छ्वडे़ जालु। पचास डड़ी ब्वलों तैं छ्वणा क् 1 घण्टा बाद 50 हौरि तैं छ्वड़े जालु। डंडी कु संचालन बिरला धर्मशाला बिटि करै जालु।

जिलाधिकारी आदेशानुसार यमुनोत्री धाम मा ध्वड़ा पड़ाव से अगनै क्वीं बि ध्वाड़ा-खच्चर अर डंडी वला कतै नी जाला।