पांचौं चरणम बि 23 प्रतिशत उम्मेदवार, इन्ना जौ पर दर्ज छन पर आपराधिक मामला

UK Dinmaan

लोकसभा चुनौ कु पाँचौं चरण मा आठ प्रदेस बिहार, झारखण्ड, जम्मू-कश्मीर, ओडिशा, महाराष्ट्र, लद्दाख, पश्चिम बंगाल अर उत्तरप्रदेसा 49 लोकसभा सीटु पर चुनौ हूंणि। यीं सीटु मा कुल 695 उम्मेदवार चुनौ क मैदान म छन।

लोकसभा चुनौ क पांचौं चरण मा बि संगीन अपराध, कतल, बलात्कार जन मामलों क आरोपि माननीय बणणा दौड़ मा सामिल छन। 695 उम्मेदारुम बटि 159 उम्मेदवारु पर आपराधिक मामला दर्ज छन। जैमा 122 पर कतल, बलात्कार, कतल करणा कोसिस, ब्यटुलों पर जुलम करणा कु मामला दर्ज छन।

या बात ऐसोसिएशन ऑफ डेमाक्रेटिक रिफॉर्म्स क रिपोर्ट म समणि ऐ। चुनौ लड़णा उम्मेदवारु म बिटि 23 प्रतिशत उम्मेदवारु मतलब 159 पर आपराधिक मामला दर्ज छन अर 18 प्रतिशत मतलब 122 खिलाप बौत गंभीर मामला दर्ज छन।

माननीय बणणा सुपिना दय्खण वला उम्मेदवारु मा 4 पर कतल कु मामलु दर्ज च। 28 उम्मेदवारु प कतल करणा कोसिस, 29 पर ब्यटुला पर जुलम करणा कोसिस त 1 उम्मेदवार पर भारतीय दंड संहिता क धारा 376 म बलात्कार कु मामलु दर्ज च। कुल 10 उम्मेदार इन्न छन जौ पर भड़कौऊ भाषण देकि महौल खराब करणा आरोप च। 3 उम्मेदवार इन्न बि छन जौ पर आरोप साबित बि ह्वेग्ये।

पांचौं चरण मा समाज वादी पार्टी क 10 उम्मेदवार चुनौ मैदान म छन, जैमा बटि पर 5 उम्मेदवारू इन्न छन जौ पर आपराधिक मामला दर्ज छन। शिव सेना क 3 उम्मेदारु पर आपाधिक मामला दर्ज छन, जैमा द्वी पर संगीन मामला दर्ज छन। भाजपा क 40 सीटु पर उम्मेदवार छन जैमा बिटि 19 सा खिलाप आपराधिक मामला दर्ज छन अर 12 क खिलाप संगीन मामला दर्ज छन। कांग्रेसा 18 सीटु मा उम्मेदवार मैदान मा छन, जैमा 8 पर आपराधिक मामला त 7 पर बौत संगीन मामला दर्ज छन। एआईएमआईएम क 4 उम्मेदारु म बिटि द्वी पर संगीन अपराधिक मामलु दर्ज च। आरजेडी क चार उम्मेदवारुम बिटि 1 पर संगीन आपराधिक मामला दर्ज च। शिवसेना उद्धव ठाकरे क 8 उम्मेदवार मैदान म छन, जैमा तिनु क् खिलाप आपराधिक मामलु दर्ज च। बीजेडी क 5 उम्मेदवारु बिटि 1 उम्मेदवार पर आपराधिक मामलु च। एआईटीसी क 7 उम्मेदवार चुनौ मैदान म छन जैमा 3 पर आपराधिक मामला दर्ज च।