ह्वे ज्यां! दूदा दूद अर पाणि कु पाणि

केंद्रीय गृह मंत्री अमित शाह न तेलंगानाम भोंगिर लोकसभाम बोलि कि 2024 कु चुनौ राहुल गांधी अर मोदी कु चुनौ च। यु चुनौ ‘विकास खूणि बोट’ कु मुकाबला ‘जिहाद खूणि बोट’ कु होलु। राहुल क् चीनी गारन्टी खिलाप मोदीक् भारतीय गारंटी कु होलु।

या से पैलि समृति ईरानी न राहुल गांधी प्रधानमंत्री लखनऊ एक कार्यक्रम मा खुलि बहसा चुनौती दे छायीं। तब स्मृति बोलि कि कांग्रेस मुद्दों से भजणि च। स्मृति ईरानी न बोलि की मेरि आज यु सबि तैं चुनौती च, अपणु चैनल, अपणु एंकर, अपड़ा मुद्दा, अपणि जगा द्विया भै-बैंण एक तरफा अर भाजपा त्रिवेदी एक तरफा ह्वे जालु दूद कु दूद अर पाणि कु पाणि।

अब जब जस्टिस (रिटायर्ड) मदन बी लोकुर, विधि आयोग क् पैल्यक अध्यक्ष अजीत पी. शाह अर पत्रकार एन राम (द हिन्दूक पैल्यक संपादक) न 9 मई खूणि कांग्रेस नेता राहुल गांधी अर पीएम मोदी तैं चुनौ से जुड्यां सवालु क जवान देंणा खूणि एक खुली कछड़ि कु न्यौता द्यायी कै लोकसभा चुनौ मा एक नै जान फूंकि दे।

राहुल गांधीन झट बहसा न्यौता तैं मंजूर कै याली।

राहुल गांधी जवाब से भाजपा क लोग झक्क हूयां छन। अर भाजपा क छ्वटा म्वटा नेता जैमा स्मृति ब्वनी च, कि जै आदिम तैं भाजपा कु एक छ्वटु सी कार्यकर्ता दगड़ि चुना लड़णा हिकमत नी च, वैथे घमण्ड करण से बचण चैंद। स्मृति ईरानी ब्वनी च कि क्य वु इंडिया गंठबन्धना प्रधानमंत्री उमेदवार छन त वुथैं इन्न करण चैंद?

साफ च दिख्येणु च कि भाजपा द्वी रणनीति पर काम करणि च एक जनता कु ध्यान भटकै कि चुनौ मा राहुल अर मोदी करणु खेल ख्यलणि च। दूसर तरफा राहुल अर मोदी बीच बहस से बचण चाणि च।

भाजपा इन्न क्वीं बहस नीं चाणि च जैमा मोदी तैं भ्यजण प्वड़यां। साफ च की भाजपा मोदी अर राहुला बहस मा कतै नीं फसण चांदी। हां भाजपा निसाणा मा त अबि बि राहुल अर कांग्रेस ही च। भाजपा जणदि च कि चुनौ राहुल अर मोदी बीच करै ज्यां त यांकु फैदा भाजपा तैं हि होलु किलैकि मोदी राजनीतिक तर्जुबा मा राहुल से बौत अगनै छन। यीं बडु कारण च की भाजपान 2024 लोकसभा चुनौ तैं मोदी राहुला बीच करणा मा अपणि सर्या तागत लगयीं च।

यांका बाद बि भाजपा राहुल मोदी बहस मा कतै नी फसण चाणि च। किलैकि अबि-अबि प्रधानमंत्री मोदी उड़ीसा क जिलौं क राजधानी क बारम पूछिकि सोशल मीडिया खूब ट्रोल हूंणा छन। यीं कारण च भाजपा छ्वटा नेता सीधा राहुल पर हि हमला करणा छन। उन्न बि प्रधानमंत्री अंबानी-अडाणी कु नौं लेकैकि पैलि फस्यां छन।

राहुल गांधीन अबि तक प्रधानमंत्री मोदी पर सीधु हमला करण से बचणा छायीं किलैकि ऊंतैं पता च कि मोदी पर सीधा हमला करणम अपणु हि नुकसान च। पर अब जन्नि राहुल तैं मोदी क दगड़ि बहस कु मौका मिलि त उन्न झट मोदी तैं बहसा चुनाती दे कैकि भाजपा तैं झक्क कै याली। राहुल गांधीन त अपणु जवाब दे याली। पर अबि प्रधानमंत्रीक् तरफां बिटि क्वीं जवाब नीं ऐ।

इन्न मा फैसला अब तुम हि कारा की राहुल गांधी अर मोदी बीच बहस करै जाण चैंद की ना। हां इतगा जरूर च कि जब राहुल गांधी बहस खूणि त्यार छन. त अब मोदी तैं बि राहुल गांधी क जिकुड़ि तैं छपछपि करणम पिछनै नी रैंण चैंद। त ह्वे ज्यां! दूदा दूद अर पाणि कु पाणि।

हां हम खूणि त बस या दय्खण वलि बात च कि चुनौक ऐ जोड़-घटौ मा कैथै कतगा अंक मिलदन।