मेजर प्रणय नेगी तैं सैनिक सम्माना दगड़ि दिये ग्यायी आखिर बिदै
देरादूण। भानियावाला, देरादूणा रैवासी मेजर प्रणय नेगी तैं पूरू सैनिक सम्माना दगड़ि हरद्वार मा आखिर बिदै दिये ग्यायी। या से पैलि जन्नि मेजर कु पार्थिव शरैल ऊंका घौर भानियावाला पौंछि वख अयां सबि लोगुक आंखों मा पाणि ऐग्ये। 36 साला मेजर प्रणय नेगी तैं सर्या उत्तराखण्ड न नमन कायी।
मेजर प्रणय नेगी की आखिर विदै मा वित्त मंत्री प्रेमचन्द्र अग्रवाल , पैल्यक मुख्यमंत्री हरीश रावत अर डोईवाला विधायक बृज भूषण गैरोला बि मौजूद छायी।
बतै दियां कि डोईवाला भानियावाला क रैंण वला मेजर प्रणय नेगी की लेह मा अचाणचक तबियत खराब ह्वे। तबियत खराब हूंणा कारण मेजर नेगी कु निधन ह्वेग्ये।
प्रणय नेगी मेजरा पद पर तैनात छायीं। ऊंकी उमर 36 साल छायीं अर तीन साल पैलि ऊंकु ब्यो ह्वे छायीं।
मेजर प्रणय नेगी क आखिर जातरा मा बड़ी संख्या मा लोग छायीं अर जब तक सूरज चांद रहेगा जन नारों न हरद्वार मा ऊतैं सैनिक सम्मान दगड़ि अंतिम विदै दिये ग्यायी।
वित्त मंत्री प्रेमचन्द्र अग्रवाल अर पैल्यक मुख्यमंत्री हरीश रावत, डोईवाला विधायक बृज भूषण गैरोला, विधायक विनोद कण्डारी शहीदा शरैल पर फुळ माला चढ़ै कि ऊतैं अंतिम बिदै दिये ग्यायी।