हाई स्कूल मा पिथौरागढ़ा प्रियांशी रावत कायी टॉप, 500 बिटि 500 नम्बर

देरादूण। उत्तराखण्ड विद्यालयी शिक्षा परिषद न आज 10 अर 12 बोर्ड कु परीक्षाफल घोषित कै याली।

हाई ईस्कूल मा पिथौरागढ़ जिला क गंगोलीहाटा प्रियांशी रावता सबसे जादा नम्बर ऐन। प्रियांशी रावतन 500 म बिटि 500 नम्बर प्राप्त करिन। त वखि 12 इमत्यान मा द्वी बच्चा पीयूष खोलिया अर कंचन जोशी का सबसे जादा नम्बर ऐन। द्विया बच्चों का नम्बर 498 छन।

हाई इस्कुला परीक्षा मा पैलु नम्बर पर गंगोलीहाटा प्रियांशी रावत त दूसर नम्बर पर रुद्रप्रयाग जिला शिवम मलेथा छन। जैका 500 म बिटि 495 नम्बर ऐन। तिसर नम्बर पर आयुष छन। आयुशा 500 म बिटि 495 अंक ऐन।

हाईस्कूल मा बेरानाग प्रियांशी रावतन क्वीं विषय इन्न नीं च जैमा वींथै 100 म बिटि 100 नम्बर नी मिला। प्रियांशी रावत क बुबा जी फौज बिटि सेवानिवृत्त छन अर ब्वै प्रियांशी क इस्कुल साधना पब्लिक स्कूल बेरानाग मा मास्टरनी च।
प्रियांशी न अपणि यीं मेनता कु श्रेय अपणा ब्वै-बुआ अर गुरुओं तैं द्यायी। प्रियांशी बुबा न बतै कि प्रियांशी रोज 4 घण्टा पढ़ै करद। अर प्रियांशी इच्छा एयर फोर्स मा जाण च।