केदारसभा क पदाधिकारियों न मुख्यमंत्री धामी तैं एक ज्ञापन अर केदारधाम मा मास्टर प्लान झट रवक्ण मांग कायी

देरादूण। 10 मई बिटि प्रदेस मा चारधाम जातरा सुरू हूणि च। शासन प्रशासन जातरा क तय्यरि मा लग्यूं च। त दूसरि तरफा केदारपूरी मा लचणू मास्टर प्लाना काम तैं लेकैकि केदारसभा क लोग नराज छन। नराज तीर्थपुरोहित अर पंडा समाजन केदारसभा के नेतृत्व मा चारधाम जातरा कु बहिष्कार करणा कु फैसला कायी।

केदारसभा क पदाधिकारियों न मुख्यमंत्री धामी तैं एक ज्ञापन भेजिकि यु काम पर झट रोक लगौंणा मांग कायी अर सरकार तैं चितै कि अगर हमरि बात नी मन्ये ग्यायी तक चारधाम जातरा कु बहिष्कार करै जालु। जातरा क सुरू हूण से पैलि हि शासन प्रशासन क समणि एक समस्या खड़ी ह्वेग्ये।

केदारनाथ म पुननिर्माण क तिसरू चरणा काम हूणा छन अर पूरणि कूड़ौं तैं त्वणें जाणा छन। ऊंकु ब्वन च की कूड़ौं तैं त्वणा क्वीं जाणकारि नी दियें जाणि च अर ना कूड़ौ मालिक तैं भरोसु म लियें जाणु च। अर यांकु असर ऊंका रूजगार पर प्वाड़लु।
केदारसभा न केदारधाम मा हूंण वला यु कामु तैं रवक्णा मांग कायी अर बोलि कि अगर काम नी रवक्यें ग्यायी त गौरीकुण्ड बिटि केदारधाम तक सर्या बजार बंद करै जाली।