धामीन बोलि कि कम मतदान हूंण से भाजपाक जीत पर क्वीं फरक नी प्वाड़लु , त हरीश रावत न बोलि कम मतदान कांग्रेसा जीत कु कारण बणलु

UK Dinmaan

देरादूण। प्रदेसा सबि सीटु मा चनौ खतम ह्वेग्ये अर सबि प्रत्याशियों की जोग अब ईवीएम मा बन्द ह्वेग्ये। अब कु जितदु अर कु हरदु या हौरि बात च। प्रदेसा म कम मतदान हूंणा बात चौछड़ि छ्वीं हूणि छन अर सबि अपणा-अपड़ा, जोड़-घटा अर गुणा-भाग लगौंण छन।

जब ऐ बारा मा मुख्यमंत्री से सवाल करै ग्यायी त उन्न बोलि कम मतदान हूंण से भाजपाक जीत पर क्वीं फरक नी प्वाड़लु। उन्न बोलि कि मतदान ठीक-ठाक हि च, हाँ थ्वड़ा बौत कम ह्वे। यांका बौत सर्या कारण ह्वे सकदन, जन्नि कि अबि ग्यूँ कटेणा छन, ब्यो हूंणा छन, जैमा लोग लग्यां छन। यीं करण ह्वे सकद की लोगु बोट डालणा खूणि नीं ऐ सक्यां।

मुख्यमंत्री से जब यु सवाल पूछें ग्यायी कि भाजपा क कार्यकर्ता बोटरू तैं बूथ तक नी ल्या साका। त उन्न बोलि कि या दुसर दळु मा चुनौ तैं लेकैकि क्वीं मतंग नी दिख्येणि छायी। जु बोट बूथ तक पौछिंन, ऊतैं ल्याणा कु काम भाजपा न हि कायी, कै हौरि दलन नी कायी अर क्वीं कोसिस बि नी कायी। मुख्यमंत्री न बोलि कि भाजपा पच्याँ सीट जितणि च। यामा हमतैं जरा बि शक नीं च।

ऐ बारा मा जब पैल्यक मुख्यमंत्री हरीश रावत तैं पूच्छे ग्यायी त हरीश रावतन बोलि कि भाजपा सरकारा नीतियों तैं लेकैकि जनता मा क्वीं मतंग नीं च। जै कारण यीं दा भाजपा कु बोटर बोट देंणा खूणि भैर नी निकलि। उन्न बोलि कि भाजपा तैं 10 से 12 प्रतिशत कम बोट मिलणा छन। वखि कांग्रेसा तैं चार से पांच प्रतिशत जादा बोट मिलला। उन्न बोलि कि दिख्यें ज्या त 15 से 16 प्रतिशत तक फरक च, अर यीं फरक हि कांग्रेसा जीत कु कारण बणलु।