2026 परिसीमन बाद, उत्तराखण्डा दसा . . .

UK Dinmaan उत्तराखण्ड म लोकसभा चुनौं चलणु च अर चुनौं कु प्रचार अबि मठु-मठुकै चलणु च। लोग ये गुणा-भाग मा लग्यां छन, कु जीतलु अर कु हारलु , कगता बोटु से जीतलु , कैकि सरकार बणलि अर कु मंत्री बणलु। एक जागरूक मतदाता तैं यु स्वचण बि चैंद। वैकि जनप्रतिनिधि अर सरकार बणौंणा मा भागीदारी हूंण चैंद।

यांक अलावा हौरि बात या च कि जब 2026 मा जब परिसीमन बाद लोकसभा अर विधानसभा चुनौं होलु त पाड़ कु क्य होलु? परवा त यीं बातिक च की की 2007 क तरौं अबकदा बि परिसीमन जनसंख्या क आधार पर होलु। इन्न मा पाड़ि जिलों मा विधानसभा सीट कम ह्वे जाली। पाड़ मा चिकित्सा, शिक्षा क कमी क दगड़ि रुजगार न मिलणा कारण पिछला कै सालु बिटि पाड़ बिटि बौत तेजी से पलायन ह्वे। प्रदेस म 1700 गौं खाली ह्वेग्येन। पाड़ बिटि लोग भैर जाणा छन, जै कारण सैंणा (मैदानी) तोक का मुकाबला लोगु संख्या बढ़णा कु ग्राफ घटणु च।

अब जरा पिछनै चलदौं! 9 नम्बर 2000 खूणि उत्तराखण्ड प्रदेस बणि। उत्तरप्रदेशा विभाजन ह्वे अर हमतैं उत्तराखण्ड प्रदेस मिलि। तब उत्तराखण्ड तैं 30 विधानसभा क सीट मिलि अर ऐ हि अधार पर उत्तराखण्डम पैलु चुनौ ह्वे। यु सीटों मा 19 सीट पाड़ क छायीं। जैका बाद 2002 मा कुलदीप सिंह कमिश्नन प्रदेसा मा विधानसभा सीटु कु परिसीमन कायी अर उत्तराखण्ड मा विधानसभा क 70 सीट बणि। जैमा पाड़ बिटि 40 अर सैंणा तोक तैं 30 सीट मिलिन। यु परिसीमन भौगोलिक आधार पर कर्ये ग्यायी। 2004 मा राष्ट्रीय परिसीमन आयोग कु गठन ह्वे अर 2007 मा उत्तराखण्डा विधानसभा सीटु कु दुबरा परिसीमन कर्ये ग्यायी। यीं दा परिसमीन का अधार जनसंख्या छायीं। मैदानी तोका एक विधानसभा सीट खूणि 01 लाख त पाड़ि तोक खूणि 85 हजारा जनसंख्या कु मानक छायीं। जनसंख्या क अधार पर ह्वे ये परिसीमना बाद प्रदेसा पाड़ि तोक मा 6 सीट कम ह्वेग्यींन अर सैंणा तोक म इतगै हि सीट बढ़िग्येन। यां से पाड़ मा सीट 34 अर मैदाना मा 36 ह्वेग्येन। यु परिसीमना आधार 2011 जनसंख्या छायीं।

अब 2026 म भी जनंसख्या क अधार पर परिसीमन होलु। स्वाचा! तब उत्तराखण्ड क्य दसा होलि? अंताज च की 2026 मा जब परिसीमन होलु त उत्तराखण्डा पाड़ा 10 जिलों क जनसंख्या 5600000 अर 3 सैणा तोका जिलों की जनसंख्या 9700000 होलि। इन्नम पाड़ मा विधानसभा सीट बौत कम ह्वे जालि अर ऐ अनुपात मा सैंणा तोक मा सीट जादा ह्वे जालि। विधानसभा मा पाड़े अवाज उठौंण वला सदस्यों क गिनती कम ह्वे जालि त उत्तराखण्ड प्रदेस बणौंणा क अवधारणा कु क्य होलु?

अब यां खूणि क्य करण की हम पाड़ि लोगु तैं अपड़ा मूल गौं मा अपणु अर अपणि सर्या कुटुम्दरि कु नौं मतदाता सूची मा लिख्वाण प्वाड़लु, बोटर कार्ड,अर बोट देंण प्वाड़लु। गौं कु परिवार रजिस्टर मा बि अपणु नौं लिख्वाण प्वाड़लु किलैकि परिसीमन जनसंख्या क आधार पर हूंद, मतदाता सूची क अधार पर नीं हूंद।