गणेशन च भाजपा तैं कायी पस्यौं बगौंण खूंणि मजबूर

गढ़वाल लोकसभा सीट जादा से जादा भाजपा क खाता मा रायी। सालुु बिटि गढ़वाल सीट पर भाजपा खूणि बौत असान रायीं। यीं कारण च 2019 मा कांग्रेसा टिकट बिटि लोकसभा चुनौ मा मैदान मा खड़ा मनीष खंडूडी लोकसभा चुनौ 2024 मा ऐन बगत मा कांग्रेस तैं छोड़िकि भाजपा खुचिलि मा जैकि बैठिग्यींन। इल्लै यु ब्वलें जाणु छायीं कि 2024 लोकसभा चुनौ मा गढ़़वाल लोकसभा सीट जितणु भाजपा खूणि बौत असान च। सबसे असान मन्यें जाणि सीट आज उत्तराखण्ड मा सब्यौं क गुच्चों मा च। गढ़़वाल लोकसभा सीटा बारा मा सबि छ्वीं करणा छन। छ्वीं छन कि कांग्रेस पौड़ी मा भाजपा से जादा ताकत दिखौंणि च। गढ़वाल सीट मा भाजपा बिटि अनिल बलूनी अर कांग्रेसा गणेश गोदियाल क नौं की घोषणा जन्नि ह्वे वे दिन बिटि भाजपा गढ़वाल सीट मा कमजोर हूंण बैठिग्ये। भाजपान न अनिल बलूनी क नामांकना दिन मा मेगा शो कायी अर प्रदेसा जनता तैं यू दिखौंणा कोसिस कायी कि भाजपा हि च बस। भाजपन मुख्यमंत्री धामी से लेकैकि कंेद्रीय मंत्री स्मृति ईरानी, तीरथ सिंह रावत, रमेश पोखरियाल निशंक जना नेताओं की भीड़ पौड़ी मा जमा कै दे।

भाजपा तैं बडु झटका गणेश गोदियाल नामांकन दिन लगि, जब गणेश गोदियालन तैं गढ़वाल जनता न ज्वा समर्थन द्यायी, वैंथै देखिकि त कांग्रेस मा नै जान ऐग्ये। गणेश गोदियाल तैं गौं मा अर सोशल मीडिया मा लोगुक जु समर्थन मिलणु च, वां से भाजपा हि ना कांग्रेस बि झक्क च। कांग्रेस तैं मिलणु वलु जनता कु ऐ समर्थन बाद भाजपा न गढ़वाल लोकसभा सीट बिटि कांग्रेसा विधायक राजेन्द्र भण्डारी राति-राति भाजपा मा सामिल कायी पर भाजपा कु यु दाव उल्टु ह्वेग्ये। राजेन्द्र भण्डारी लोकसभा क्षेत्र त दूर अपड़ि विधानसभा मा बि बोट नी मांगि सकणा छन। राजेन्द्र भण्डरी तैं भाजपा मा सामिल करण से लोग नराज छन। भाजपा क कार्यकत्ता राजेन्द्र भण्डारी तैं पैचे नी सकणा छन।

गढ़वाला विचारक, सामाजिक कार्यकर्ता, रंगकर्मी संस्कृत कर्मी, स्वतंत्र पत्रकार गायक सबि गणेश गोदियाल समर्थन मा खड़ा छन। भाजपा प्रत्याशी बलूनी पार्टीक राष्ट्रीय मीडिया प्रभारी छन। इन्न मा या उमेद छायीं कि मीडिया, सोशल मीडिया, न्यूज पोर्टल बलूनी की समर्थन काराला पर इन्नु नी ह्वे। गढ़वाल सीट मा बदलु ऐ रंगन भाजपा आलाकमान क मुण्ड मा मुण्डरु कै याली। गणेश तैं मिलणु लोगुकु समर्थना छ्वीं दिल्ली भाजपा दप्तर मा खूब हूंणि छन। भाजपा क रणनीतिकार परेशान छन। आज गढ़वाल लोकसभा सीट भाजपा कु नाक सवाल ह्वेग्ये किलैकि यख बिटि प्रधानमंत्री क राष्ट्रीय सलाहकार अजीत डोभाल, देसा पैलि सीडीएस विपिन रावत, अर सीडीएस ले. जनरल अनिल चौहान, सबि गढ़वाल बिटि छन।

ब्याली तक गढ़वाल सीट बिटि चुना लडणा खूणि कांग्रेस बड़ा नेता त्यार नीं हूंणा छायीं अर आज गणेश गोदियाल चुनौ मा आणा बाद हवा बदलि ह्वेग्ये। आज पौड़ी लोकसभा हॉट सीट ह्वेग्ये।

अब भाजपा तैं गढ़वाल सीट बिटि अपणि रणनीति बदलि करण प्वड़णि च। अब गढ़वाल सीट बिटि धामी तैं कमान देयाली अर ऊंकी चुनौवी सभाओं क संख्या तैं हौरि बढ़ै याली। अब उत्तर प्रदेसा मुख्यमंत्री योगी श्रीनगर, पौड़ी, रक्षामंत्री राजनाथ सिंह, राष्ट्रीय अध्यक्ष जेपी नड्डा, गृह मंत्री अमित शाह तैं बि गढ़वाल सीट मा लगौंण प्वडणु च। उत्तराखण्ड मा जख भाजपा कु दांव पंच्या सीट जितणा छायीं अर चुनौ तरफा बतौंणि छायीं।
वख आज गणेशन त भाजपा तैं दुबरा गुणा-भाग कैकि हौरि पस्यौं (पसीना) बगौंण खूणि मजबूर कै द्यायी।