कांग्रेसा मुखड़ि मा दख्येणि च नै चलक्वार

लोकसभा कु शंख बजिग्ये। कांग्रेस, भाजपा अर निर्दलीय सिपै मैदान मा छन। ब्याली तक जु चुनौ कु मैदान खाली दिख्येणु छायीं, वै चुनौ क मैदान मा एक नै उमंग दिख्येणि च।

पौड़ी लोकसभा सीटा नामांकन मा जु भीड़ छायीं, वीं भीड़ तैं देखिकि जख भाजपा अपणु मुण्ड कंज्यौंणि (खुजाना) त कांग्रेसा मुखड़ि मा नै चलक्वार दिख्येणि च।

जै कांग्रेस मा ब्याली तक नेता की भागम-भाग ह्वीं छै, क्वीं चुनौ लड़णा खूणि त्यार तक नीं हूंणू छायीं। पैलि कांग्रेसा मनीष खंडुडी न कांग्रेस कु हत्थ छोड़ि। त वखि टिरी बिटि कांग्रेसा पैल्यक विधायक धनसिंह नेगी, पैल्यक मंत्री हरक सिंह रावत कु ब्वारी अनुकृति गुसाई अर पैल्यक जिला पंचायत अध्यक्ष लक्ष्मी राणा न कांग्रेस कु हत्थ छोड़ि दे। कांग्रेसा पीड़ा कम बि नीं ह्वे छै कि बदरीनाथ सीट बिटि कांग्रेेसा विधायक राजेन्द्र भण्डारी न बीच बाटु मा कांग्रेस छोड़ि की कांग्रेस तैं अद्ध म्वरू कै दे। कांग्रेस हरद्वार अर नैनीताल सीट बटि कथैं चुनौ मैदान मा उतरण याकु फैसला मा हि अलझीं छायी अर ब्वलें जाणु छायीं कि कांग्रेसा क्वीं उमेदवार चुनौ लड़णा खूंणि त्यार नी च।

पर अब कांग्रेस उमेदवारु नामांकन मा ज्वा भीड़ छायीं वीं भीड़ तैं देखिकि कांग्रेसा पार्टी तैं उत्तराखण्ड मा नै जिन्दगि मिलिग्ये। खास कैकि पौड़ी गणेश गोदियाल नामांकन मा लोगुक उमंग देखिकि कांग्रेस तैं अब पौड़ी सीट मा त जीत गंध आण बैठिग्ये। इल्लै कांग्रेसा बड़ा नेता अर पैल्यका मुख्यमंत्री हरीश रावत जु अपड़ा नौना चुनाव मा लग्यां छन। उन्न बि गणेश गोदियाल नामांकन भीड़ तैं देखिकि सोशल मीडिया मा लेखिकि बल भौत खूब शुरुआत ह्वेगे जय श्रीगणेश। पौड़ी लोकसभा क्षेत्र का सबि रैवास्यूं तैं धन्यवाद। तुमन गणेश तैं अपणा आशीर्वादक दुर्वा चढ़ा द्याई, तुम सबन पहल चरण मा होण वला चुनौ मा कांग्रेसक जीत कि पौ धैरेलि। आपको भौत-भौत धन्यवाद।

त वखि ब्याली देरादूण बिटि सोशल मीडिया ज्वा तस्वीर टिरी बिटि भाजपा उमेदवार राज्य लक्ष्मी शाह अर गणेश जोशी की आणि च वा भाजपा तैं झक त कांग्रेस खूणि तैं नै उमेद च की लोग अब टक लग्यें की दुबरा कांग्रेसा पर भरोसु करणा छन। लोगुक ऐ भरोसु तैं देखिकि कांग्रेेसा मुखड़ि मा नै चलक्वार दिख्येणि च।

साफ च ब्याली तक जैं कांग्रेस तैं दूर-दूर तक चुनौ जितणा क्वीं उमेद नी दिख्येणि छायीं आज वा कांग्रेस भाजपा दगड़ि चुनौ मैदान मा लड़णा खूणि अपड़ा सींग पल्यौंणि च।

बॉबी पंवारा नामांकना मा भीड़ अर पौड़ी गणेश गोदियाल नामांकन मा भीड़ा छ्वीं सबि जगा हूंणि छन बस अब दय्खण वलि बात च कि या भीड़ बोट कैथै दिन्द अर जितान्द। अबि त या सबि भवैष्य पुुटगा मा च पर ज्वा भीड़ गणेश गोदियाल नामांकन मा अयीं छायीं वा कांग्रेस तैं नै ज्यूंदु के ग्यायी अर ब्याली तक उत्तराखण्ड मा ग्वाया (घुटने के बल चल रही) लगौंणि कांग्रेस तैं दुबरा खडु हूंणा हिकमत दे ग्यायी। यीं वा बात च कि हरीश अर गणेश जीत कु दावा करणा छन।