नगर निगमा 138 हेक्टयर जमीन मा अवैध कब्जा

देरादूण। अबि कुछ मैना पैलि नगर निगमन राजस्व विभागा दगड़ि मिलकैकि जमीनु क पैमाइश कायी। जैमा ज्वां बात समणि वा नगर निगमा बुज्यां आंखौ तैं ख्वलिणि च।

बतै दियां कि साल 2018 नगर निगम मा देरादूणा क 72 गौं तैं शामिल करै ग्यायी। यु गौं का नगर निगम मा सामिल हूंण से नगर निगमा नौं पर 706 हेक्टेयर जमीन ऐग्ये छायीं। जैमा कुछ जमीन विगागु तैं, त कुछ संस्थान तैं दियेग्यायी। पैमाइश बाद बात समणि ऐ कि नगर निगमा की 138 हेक्टेयर जमीन मा अवैध कब्जा ह्वेग्यायी।

जैका बाद अब नगर निगमन यु फैसला कायी कि पैलि ज्वां जमीन अबि बच्यीं वीं जमीन मा घेर बाड़ करै जाली। यांका बाद कब्जा वलि जतगा बि जमीन च वीं जमीन तैं खाली कर्ये जालु।

नगर निगम तोक मा सबसे जादा कब्जा नाला-खालों क किनारों पर खाली जमीन मा अर कतगै जगो मा नालों तैं ढक्कैकि बि कब्जा करै ग्ये। सबसे जादा कब्जा मोथरावाला, बंजारावाला, चिड़ोवाली, धोरणखास, गुजराड़ा, मानसिंह, चन्द्रबनी, मोहकमपुर खुर्द कंडोली, आमवाला, डांडा धोरण, सौंधोवाली, आमवाला तरला, चालंग, डांडा लखौंड मा करै ग्यायी।

ऐ बारा मा नगर निगम मा भूमिकर अधीक्षक न बतै कि नगर निगम मा साामिल 72 गौं क जमीन कु सर्वे पूरु ह्वेग्ये। 72 गौं की लगभग 706 हेक्टर जमीन नगर निगमा नौं मा ऐ छायीं। जैमा बिटि लगभग 138 हेक्टर जमीन पर कब्जा मिलि। उन्न बोलि पैलि ज्वां जमीन बच्यीं च, वीं जमीन पर घेर बाड़ करै जाली यांका बाद अवैध कब्जा वलि जमीन पर बिटि कब्जा हटयें जालु।