बेरोजगार संघ न कायी मुख्यमंत्री आवास कूच

देरादूण। उत्तराखण्ड बेरोजगार संघा झण्डा निस आज बेरोजागारों न मुख्यमंत्री आवास कूच कायी। पुलिस सचिवालय से पैलि ऊंतै बेरीकेटिंग लगै की रोकि द्यायी। बरोजगार अर पुलिस मा खूब घपरोळ ह्वे। जैका बाद बेरोजगार संघ वखि सड़किमा बैठिग्यीं। बाद मा सिटी मजिस्ट्रेट अर एसपी सिटी न बेरोेजगारू बटि ज्ञापन ल्यायी।

आज बेरोजगार संघा अध्यक्ष बॉबी पंवार अर उपाध्यक्ष राम कंडवाल नेतृत्व मा प्रदेसा बेरोजगार परेड़ गिरौड़ मा जमा ह्वीं। जब बिटि उन्न मुख्यमंत्री आवास घेरणा खूणि जलूस निकाली कनक चौक बिटि बेरोजगार जनि पैसिफिक होटला नजीक पौछिंन पुलिसन बेरीकेटिंग लगै कि ऊंतैं वखि रोकि दे। बेरोजगारू न अगनै जाणा खूब कोसिस कायी पर पुलिसन ऊतैं अगनै नी बढ़ण दे। जै से नराज बेरोजगार वखि सड़किम बैठिग्यीन।

बॉबी पंवारन बोलि कि उत्तराखण्डा विभागु मा 65000 पद खाली छन। उन्न बोलि मुख्यमंत्री अर विभागीय मंत्री लगातार ब्वना छन कि खाली पदु मा भर्ति करै जाली पर जमीन मा कुछ नी दिख्येणु च। उन्न बोल 10 मार्च 2024 तक आचार संहिता लगि जाली। यांका बाद बि लोकसेवा आयोग अर अधीनस्थ सेवा चयन आयोग भर्ति खूणि विज्ञापन जारी नी करणु च जु की बौत गलत च।

धरना मा प्रदेस संहयोज सुशील कैंतुरा, विशाल चौहान, सुनील सिंह अखित तोमर, नवीन चौहान, संजय सिंह , युवराज , अरविंद छायीं।