मुख्यमंत्री धामी न कैंची धाम बिटि ‘सांस्कृतिक उत्सव’ कु शुभारंभ कायी
देरादूण। मुख्यमंत्री धामी न आज कैंची धाम बिटि प्रदेसा मा सांस्कृतिक उत्सव कु शुभारंभ कायी। मुख्यमंत्री न आज कैंची धाम अर घोड़ाखाल मंदिर बिटि स्वच्छता अभियान चलैकि, लोगुतैं ये अभियान से जुड़णा खूणि बोलि। मुख्यमंत्रीन ये मौका पर 24.68 करोड़ रुप्यौं की योजनौं कु शिलान्यास बि कायी।
मुख्यमंत्री न कैंची धाम मा श्रीराम शिला क साफ-सफै कैकि पूजा कायी अर श्री राम भजन कार्यक्रम मा भाग ल्यायी। ऐ मौका फर उन्न मंदिर मा अयां श्रद्धालुऔं तैं प्रसाद बि द्यायी।
मुख्यमंत्री न लोगु से सरकार कन्नु काम करणि च यांका बारा म बि पूछि। उन्न स्वच्छता अभियान म सामिल हूंण वला पर्यावरण मित्रु से बात कायी। मुख्यमंत्री न स्वयं सहायता समूह, ग्राम प्रधानु अर पर्यावरण मित्रु तैं प्रशस्ति पत्र बि दीं।
मुख्यमंत्री धामी न बोलि कि प्रदेसा सरकार कैंची धाम कु मास्टर प्लान त्यार करणि च, जै से भवैष्य मा यख आण वलि जातरियौं तैं हौरि सुविधा मिललि अर धार्मिक अर अध्यात्मिक पर्यटन तैं बढ़ावा मिललु।
ऐ मौका पर जिला पंचायत अध्यक्ष बेला तोलिया, जिलाध्यक्ष प्रताप बिष्ट, विधायक सरिता आर्य, भीमताल राम सिंह कैड़ा, प्रमोद नैनवाल, मंडी बोर्ड अध्यक्ष डॉ. अनिल डब्बू, पेयजल अनुश्रवण समिति अध्यक्ष दिनेश आर्य, जिला महामंत्री रंजन बरगली छायीं।