नगर निगम देरादूण मा ह्वे करोड़ो रुप्यौं कु घपला

देरादूण। नगर निगम देरादूण मा एक हौरि घपला समणि ऐ। निगम पार्षदों अर अधिकारियों न मिलिकैकि मोहल्ला स्वच्छता समितियों म 60 करोड़ से जादा कु घपला कायी।

देरादूण 100 वाडु मा 1021 पर्यावरण मित्र काम करणा छन। जैमा जादा से जादा जाळि (फर्जी) छन। या बात आरटीआई मा समणि ऐ अर आरटीआई एक्टिविस्ट विकेश नेगी न यु खुलासा कायी।

विकेश नेगीन सूचना अधिकार म नगर निगम देरादूण बिटि स्वच्छता समिति की सूची मांगि। आरटीआई मा मिलि सूचना म सबि 100 वाडु मा 1021 सफै कर्मचारी नौकरि पर छन। यु कर्मचारियों तैं रोजना 500 रुप्या मिलदन, सफै कर्मचारियों तैं या राशि पार्षदु क जरिया मिलदी। सूची मा देरादूणा सबि वाडु मा नौकरि करणा कर्मचारियों का नाम अर पता तैं लेकैकि भरम च। आरटीआई बिटि मिलि सूचना मा जादा से जादा कर्मचारियों कु क्वीं पता हि नीं च।

सूचना म जु बात समणि ऐ वा सबियों तैं परेशान करणि च। देरादूणा लगभग सबि वाडु मा जाळि (संदिग्ध कर्मचारी) कर्मचारी काम करणा छन। पार्षदु न पर्यावरण क नौ पर ऊधमसिंह नगर, रूड़की, बिजनौर, मुजफ्फरनगर, सहारनपुर हि न आजमगढ़ क सफै कर्मचारियों काम पर धर्यां छन। जब देरादूण जिलाधिकारी न सत्यापन कायी त जादा से जादा कर्मचारी काम पर हि नी छन।