भाजपा हाईकमान कु ‘पुष्कर’ प्रयोग बड़ा प्रदेसु मा बि

छत्तीसगढ़ म विष्णुदेव साय, मध्यप्रदेश म मोहन यादव अर राजस्थान म भजनलाल शर्मा। हिंदी भाषा क इन तिन्या प्रदेसु म नै लोगु तैं मुख्यमंत्री क कुर्सी देकैकि भाजपा हाईकमान न सब्यौं तैं झकोळ दे।

भाजपा क ऐ फैसला क पिछनै राजनैतिक लोग भाजपा क भिरत गुटबाजी, त कुछ लोग भवैष्य क राजनीति दय्खणा छन।
क्वीं ऐथैं सोशल इंजीनियरिंग ब्वनु च, त क्वीं बड़ा नेता तैं एक कुणा म फ्यकणा कोसिस, त क्वीं मोदी शाह कु सरप्राइज बतौंणु च। अब जरा दुसर बात करदो त, न त या क्वीं जादु च अर न राजनैतिक चाल। सच्च त यो च बल भाजपा म राजनीति कु नै दौर सुरु ह्वैग्यें। पैलि, दुसर, तिसर न बल सीधा चौथी लैन क नेताओं तैं मौका दियें जाणु च। यांक सुरुवात भाजपा हाईकमान न 2021 म उत्तराखण्ड बटि सुरु कै दे छायीं, जब पिछनै बैट्ठिण वला धामी तैं नतड़क (अचानक) प्रदेसा जिम्मेबरि सौंपि द्यायी।

पुष्कर प्रयोग सफल हूंणा बाद भाजपा अब हौरि प्रदेसु म बि इना नै लोगु तैं प्रदेसा जिम्माबरि देंणि च। याद कारा साल 2021 म उत्तराखण्ड म तीरथ सिंह रावत क इस्तीफा बाद पार्टी न दुसर बारा क विधायक धामी तैं मुख्यमंत्री बण्यें कि राजनीतिक जणगुरू क सबि अंताज तैं गलत साबित कै दे छायीं। वै बगत धामी मुख्यमंत्री पद खूंणि नै छायीं। धामी तैं अगनै कैकि भाजपा न 2022 कु चुनौ मा बड़ी जीत हासिल कायी। अर प्रदेसा इतिहास म पैलि बार दुबरा सरकार बण्यें। धामी अपणि सीट खटीमा म प्रचार नीं कै साका अर हारि ग्येंन। यांका बाद बि पार्टी वु पर भरोसु कायी अर दूसर बार प्रदेस जिम्मेबार ऊंका कांधो म द्यायी। 6 मैना पैलि कु अपड़ा कार्यकाल म मुख्यमंत्री धामी क सीधु स्वभाव अर क्षमता सब्यौं क समणि ऐग्यें छायीं। धामी क यीं गुण हाईकमानै आंख्यिौं म ऐग्येंन। अपणि दूसर पारी मा धामी खुब बेत्तर काम करणा छन।
मुख्यमंत्री धामी क सरकार न बड़ा-बड़ा फैसला लिन। सरकार क कुछ फैसला देस क दूसर प्रदेसु तैं बि सीख देंणा छन। जन भर्ति इमत्यान खूंणि सख्त नकल विरोधी कानून, समान नागरिक संहिता कु ड्राफ्ट त्यार च, प्रदेसा ब्यटुळों तैं सरकारि नौकरी म 30 प्रतिशत आरक्षण, राज्य आन्दोलनकारियों तैं 10 प्रतिशत क्षैतिज आरक्षण , सखत धर्मांतरण कानून, अंत्योदय परिवार तैं मुफत साल म तीन गैस सिलेण्डर जनि फैसलों से धामी अपड़ा प्रदेस हि ना बल हौरि प्रदेसु मा बि मयाळु ह्वैग्येन।
‘जी 20’ क तीन कार्यक्रम अर ‘उत्तराखण्ड ग्लोबल इन्वेस्टर समिट’ क सफल आयोजन से सर्या देस टक धामी पर लग्यीं च। उत्तराखण्ड राजनीति म पुष्कर सिंह धामी कु कद बडु़ ह्वैग्यें। धामी क सबि कामु क अधार पर सबि मनखि पुष्कर तैं हारी बाजी तैं जितण वला बाजीगर बतौंणा छन।

यखम या बात समझण वलि कि साल 2022 म भाजपा हाईकमान न धामी तैं मुख्यमंत्री हि नी बण्यें बल ऊंका शपथ ग्रहण समारोह म सर्या देसा बड़ा नेतौं तैं बि बुल्यें कि ऊंकु मनोबल बढ़ै अर यु रैबार द्यायी कि आणु वलु बगत नै नेतों कु होलु। भाजपा न यीं रणनीति तैं मध्यप्रदेस, राजस्थान अर छत्तीसगढ़ म बि अगनै बढ़ै अर विष्णुदेव साय, मोहन यादव अर भजन लाल शर्मा तैं अपणि काबिलयत साबित करणा कु मौका दे। छ्वटा अर बड़ा प्रदेसु म नै लोगु तैं मौका देकैकि भाजपा न नै युगा सुरुवात कै याली। भाजपा हाईकमान नजरुन दय्खयें ज्यां त यु नै सम्भौवना क लगुला तैं ठडय्यौंण (सहारा देना) जन च।