निवेशकु तैं रैबार उत्तराखण्ड मा निवेशा बौत सम्भौवना छन

उत्तराखंड ग्लोबल इन्वेस्टर्स समिट 2023 म पौछ्या प्रधानमंत्री न देवभूमि से अपणु लगाव क बारा खुद बतै अर बोलि कि कुछ साल पैलि मि बाबा केदारा दर्शन खूंणि अयूं छायीं त अचाणचक म्यारा गिच्चु बटि निकलि कि 21 वीं सदी कु यु तिसरु दशक उत्तराखण्ड कु दशक होलु। अब मि यीं बात तैं सच हून्दा दय्खणु छौं। प्रधानमंत्री म अपणु ज्यू क पिड़ा बि तै कि पाड़ पाणि अर यखक ज्वानी यखक काम नी आन्दि।

प्रधानमंत्री न बोलि कि मोदी न या बात ठाणि याली कि अब पाड़ै ज्वानी पाड़ क काम आली। प्रधानमंत्री योग आयुर्वेद, तीर्थ अर साहसिक खेलु क तोक म काम करणि क बारा म बि बोलि। प्रधानमंत्री निवेशकु से विनति कायी कि प्रदेसा जु नीति बण्यीं छन, ऊंकु फैदा उठावा, सरकार नीति बणान्द, जु सब्यौं खूंणि हून्दन। तुम सबि ऐ मौका फर यख अयां छौं। जैमा म दम च, वु अयां मैदान मा अर फैदा उठै ले। प्रधानमंत्री गारन्टी द्यायी कि जु बात हम ब्वलदन, वीं बात तैं खड़ा रन्दन अर वीं तैं पूरू करदन। उत्तराखण्ड कु मि फर साख अधिकार च अर म्येरि जिन्दगि क एक पहलु तैं बणौंणा म यीं धरति कु बौत बडु योगदान च।

प्रधानमंत्री न धामी सरकार खुब बढ़ै कायी अर बोलि धामी सरकार केन्द्र सरकार दगड़ कदम से कदम मिलौंणा म पिछनै नी च। केन्द्र सरकार योजनों कु उत्तराखण्ड म बौत अच्छि तरौ चलणि छन अर ‘डबल इंजन’ सरकार क डबल कोसिस चौतर्फा दिय्येंणु च। आज आज गौ की सड़क हूयां या चारधाम द्वियौं म बौत तेजी से काम चलणु च।

प्रधानमंत्री न बोलि कि उत्तराखण्ड द्यब्तौं पवैत्र भूमि च। यख दिव्यता अर विकास एक दगड़ चितौंदन (अहसास)। उन्न देेेवभूमि तैं अपणि कर्मभूमि बतै अर निवेशकु तैं बोलि कि रौंत्याला उत्तराखण्ड तैं चकदक बणौंणा खूंणि अगनै अयां उन्न बोलि मिन उत्तराखण्ड भावना अर सम्भौवना तैं नजीकि बटि देखि, वै थैं समझि अर महसूस कायी, आज देवभूमि अपड़ा द्वार तुम खूंणि ख्वलनी च। आज भारत विकास अर विरासत कु जाप क दगड़ अगनै बढ़णु च अर उत्तराखण्ड समणि च। आज तुम सब्यौं तैं उत्तराखण्डा गौरव, उत्तराखण्ड विकास जातरा मा ज्वड़णा कु मौका मिलणु च।

अब या त दय्खण वलि बात च कि प्रदेसा म कतगा निवेश हून्द पर या बात साफ च कि प्रधानमंत्री निवेशकु समणि उत्तराखण्ड क खुब तारिफ कै ग्येन अर समिट मा अयां निवेशकु तैं यु रैबार दे ग्येन कि उत्तराख्ण्ड मा निवेशा बौत सम्भौवना छन।