प्रधानमंत्री मोदी न धामी अर धामी सरकार क खुब कायी बढ़ै

देरादूण। प्रधानमंत्री मोदी न एकदा दुबरा मुख्यमंत्री धामी अर धामी सरकार क खुब बढ़ै कायी। उन्न बोलि धामी सरकार केन्द्र सरकार दगड़ कदम से कदम मिलौंणा म पिछनै नी च। केन्द्र सरकार योजनों कु उत्तराखण्ड म बौत अच्छि तरौ चलणि छन अर ‘डबल इंजन’ सरकार कु द्वीगुणा फैदा उत्तराखण्ड तै मिलणु च। प्रधानमंत्री न 29 मिनटा कु भाषण मा कै दा उत्तराखण्ड क बढ़ै कायी।

प्रधानमंत्री न बोलि कि कुछ साल पैलि मि बाबा केदारा दर्शन खूंणि अयूं छायीं त अचाणचक म्यारा गिच्चु बटि निकलि कि 21वीं सदी कु यु तिसरु दशक उत्तराखण्ड कु दशक होलु। अब मि यीं बात तैं सच हून्दा दय्खणु छौ। प्रधानमंत्री न सिलक्यारा सुरूंग मामला बारा मा बोलि क अबि कुछ दिन पैलि उत्तरकाशी म भुरत्यौं तैं सुरूंग बटि भैर निकलणा कु सफल अभियान चल्यें ग्यायी, यां खूंणि बि पूरि प्रदेस सरकार कु अभार।

प्रधानमंत्री न बोलि केन्द्र अर प्रदेसु मा बणणि सरका क बारा मा बोलि कि आज भारत क रैवासी स्थिर सरकार चाणा छनं। उन्न बोलि यु काम उत्तराखण्ड न बि कायी। यखकि जनता न बि गुड गवर्नेस खूंणि बोट द्यायी। प्रधानमंत्री न बोलि कि उत्तराखण्ड म डबल इंजन सरकार क डबल कोसिस चौतर्फा दिय्येंणि च। प्रदेस सरकार जमीनी सच तैं समझिकि यख खळाखळ विकासा काम करणि च। उन्न बोलि हमरि योजनौं अर हमरि सोच पर प्रदेस सरकार बौत तेजी काम करणि च। प्रधानमंत्री न बोलि कि आज गौ की सड़क हूयां या चारधाम द्वियौं म बौत तेजी से काम चलणु च।

‘हाउस ऑफ हिमालय’ ब्रांड क लांचिंग पर द्यायी बधै
प्रधानमंत्री मोदी न बोलि मि आज उत्तराखण्ड सरकार तैं “हाउस ऑफ हिमालय” ब्रांड लॉज करणा खूंणि बधै देन्दू। यु उत्तराखण्ड क घर्या उत्पादु तैं विदेसी बजार तक पौंछणाक बड़ी कोसिस च। यु वोकल फॉर लोकल अर वोकल फॉर ग्लोबल क अवधारणा तैं हौरि कटकुट करदु। यां से उत्तराखण्ड घर्या चीजु तैं विदेसी बजार मिललु।