‘मेड इन इंडिया’ जनि एक ‘वेड इन इंडिया’ आंदोलन चलण चैंद : प्रधानमंत्री

देरादूण। ‘मेक इन इंडिया’ क तरौ देस म ‘वेड इन इंडिया’ आंदोलन चलण चैंद। या बात आज प्रधानमंत्री उत्तराखण्ड ग्लोबल इन्वेस्टर्स समिट 2023 म बोलि।

प्रधानमंत्री न बोलि कि ब्यौ कु जोड़ि भगवान तय करदु। इन्न म ब्यौ करण वलों जोड़ियों तैं अपड़ा जिन्दगि नै सुरुवात भगवान क चरणु म करण चैंद। उन्न बोलि विदेश जैकि ब्यौ करण जगा म हमतैं देवभूमि उत्तराखण्डा धार्मिक जगों मा ऐकी ब्यौ करण चैंद।

प्रधानमंत्री न ज्वान नौन्याळु तैं बोलि कि जन ‘मेड इन इंडिया’ च उनि हमतैं एक ‘वेड इन इंडिया’ आंदोलन चलण चैंद। प्रधानमंत्री बोलि कि पैसों वला खूंणि यु एक फैशन ह्वैग्ये। उन्न बोलि अब आण वला पांच सालु म अपणि कुटुम्दरि कु एक ब्यौ उत्तराखण्ड मा कर्या। एक साल मा 5 हजार ब्यौ यख होला त यख एक नै इंफ्रास्टक्चर खडु ह्वै जालु अर उत्तराखण्ड दुन्या खूंणि बौत बडु वेडिंग डेस्टिनेशन बणि जालु। प्रधानमंत्री न बोलि भारत म इतगा तागत च कि मिलकैकि करला व सब ह्वै जालु।

प्रधानमंत्री न बोलि कि भारत में बदलावा क बत्थौं (हवा) चलणु च। उन्न बोलि कि उत्तराखण्ड निवेशकु खूंणि बौत बडु़ बजार तय्यार करणु च। प्रधानमंत्री न उत्तराखण्ड सरकार तैं हाउस ऑफ हिमालय ब्रांड लॉन्च करणा खूंणि बौत बधै दे। उन्न बोलि कि उत्तराखण्ड क घर्या उत्पादु तैं विदेसी बजार तक पौंछणाक बड़ी कोसिस च। यु वोकल फॉर लोकल अर वोकल फॉर ग्लोबल क अवधारणा तैं हौरि कटकुट करदु। यां से उत्तराखण्ड घर्या चीजु तैं विदेसी बजार मिललु।