सिलक्यारा मा टनल म वर्टिकल ड्रिलिंग कु काम ह्वै सुरु

उत्तरकाशी क सिलक्यारा मा टनल मा फस्यां 41 भुरत्यौं तैं बणौंणा का काम आज पन्दरौं दिन मा बि जारी च। भुरत्यौं तैं बचौंणा खूंणि अब वर्टिकल ड्रिलिंग कु काम सुरु ह्वैग्यें।

आज सुबेर बर्टिकल ड्रिलिंग कु काम सुरु ह्वै। त दूसर तरफा सुरूंगा माटु म फंसी बरमा मसीन तैं कटणा कु काम बि खळाखळ चलणु च।

हैदराबाद बटि प्लाज्मा कटर मसीन उत्तरकाशी पौंछि ग्यायी। चंडीगढ़ बटि लेजर कटर मसीन मगयें ग्यायी, माटु मा फंसी बरमा मसीन तैं निकलण कोसिस बि हूंणि च।

आज एनएचआईडीसीएल क प्रबंध निदेशक महमूद अहमद न बतै कि हमन छंचर बटि 2 से 3 विकल्पु पर काम सुरु कै याली। एसजेवीएनएल तैं वर्टिकल ड्रिलिंग कु काम दियें ग्यायी। उन्न बोलि कि जखम ड्रिलिंग ह्वै सकद वा जगा क देखि याली। उन्न बतै कि अबि तक 15 मीटरा ड्रिलिंग बि पूरि ह्वै ग्यायी। अर उमेद च कि अबि 86 मीटरा ड्रिलिंग हौरि करण प्वाड़लि जु द्वी दिन मा पूरि ह्वै जाली।
उन्न बतै कि दुसर तरफा बरमा मसीन तैं निकलणा कु काम चलणु च। 13.9 मीटर ऑगर मसीन क पार्ट्स सुरुंग मा फस्यां छन। भोल तक वैथैं निकले जालु। जैक बाद अगनै कु काम मजदूरु क मदत से कर्यें जालु। 28 नवम्बर बटि आरवीएनएल कु काम सुरु कर्ये जालु। उन्न बोलि कि हमन पूरु काम खूंणि 100 घण्टों कु लक्ष्य धर्यूं च।