वैश्विक स्तर पर उत्तराखण्ड क अलग पछ्याण बणौंणा कु बौत अच्छु मौका च : धामी

देरादूण। मुख्यमंत्री धामी न आज मुख्यमंत्री आवास मा प्रदेसा मा हूंणा विकास क कामु मा हौरि तेजी ल्याणा खूंणि शासन क बड़ा अधिकारियौं क दगड़ि बैठक कायी।

ऐ मौका पर मुख्यमंत्री न बोलि कि उत्तराखण्ड तैं वैश्विक स्तर पर अलग पछ्याण बणौंणा कु बौत अच्छु मौका च। मुख्यमंत्री न अधिकारियों तैं निर्देश दीं अर बोलि बल उत्तराखण्ड ग्लोबल इन्सेस्टर्स समिट क जरिया अब तक हूयां रोड शो मा जु करार ह्वै, उ करार तैं पूरु करणा खूंणि तेजी से काम कर्यें ज्यां।

देरादूण म 8 अर 9 दिसम्बर 2023 खूंणि उर्यें जाण वलु इन्सेस्टर्स समिटा सबि कामु पर काम हूंणू च। मुख्यमंत्री न बोलि कि प्रदेस मा निवेश तैं बढ़ावा देंणा खूंणि असान नीति बणौंणा जरूरत च त यां खूंणि प्रस्ताव बण्यें ज्यां।

मुख्यमंत्री न बोलि कि औद्योगिक निवेश तैं अगनै बढ़ौंणा देेेंणा खूंणि हवै कनेक्टिविटी तैं और बढ़ौंण की जरूरत च। जॉलीग्रांट एयरपोर्ट अर पंतनगर एयरपोर्ट तैं अंतरराष्ट्रीय एयरपोर्ट बणौंण खूंणि प्रदेस क तरफि बटि हूंण वलि कारवै तैं झट से पूरू कर्यें ज्यां। मुख्यमंत्री न बोलि कि मानसखण्ड मंदिर माला मिशन कु मास्टर प्लान पर खळाखळ काम कर्यें ज्यां।

प्रदेस म गढ़वाल मंडल अर कुमौं मण्डल व औंण वला श्रद्धालुऔं क सुविधा खूंणि द्विया मण्डलु क बीच जुड़ाव (कनेक्टिविटी) कु काम तेजी से कर्यें ज्यां।

ऐ मौका पर मुख्यमंत्री न औंण वला त्योवार पर कानून बन्दबस्त क समीक्षा बि कायी अर अधिकारियौं तैं बोलि कानून बन्दबस्त म क्वीं लापरवै नीं हूंण चैंद।

ऐ मौका पर मुख्य सचिव डॉ. एस.एस. संधु, अपर मुख्य सचिव श्रीमती राधा रतूड़ी, आनन्द बर्द्धन, सचिव आर.मीनाक्षी सुंदरम, शैलेश बगोली, विनय शंकर पाण्डेय, एस.एन. पाण्डेय, अपर पुलिस महानिदेशक ए.पी. अंशुमन, अपर सचिव रणवीर सिंह चौहान, युगल किशोर पंत, सी. रविशंकर, महानिदेशक उद्योग रोहित मीणा, महानिदेशक सूचना बंशीधर तिवारी, महानिदेशक यू कॉस्ट प्रो. दुर्गेश पंत, अपर सचिव जे.सी काण्डपाल अर हौरि अधिकारी बैठक मा छायीं।