राष्ट्रपति न करिन भगवान बदरी विशाला दर्शन
देरादूण। राष्ट्रपति श्रीमती द्रौपदी मुर्मु न आज भू-बैकुंठ धाम पा पौंछकि भगवान बदरी विशाला दर्शन करिन राष्ट्रपति न देसा जस (समृद्ध) अर देसा सबि रैवासी राजि खुसि रैयां या कामना भगवान बदरी विशाल से कायी।
राष्ट्रपति कु बदरीधाम मा औंण पर उत्तराखण्ड राज्यपाल लेफ्टिनेंट जनरल गुरमीत सिंह (से.नि), मुख्यमंत्री धामी, बदरी केदार मंदिर समिति क अध्यक्ष अजेन्द्र अजय, जिलाधिकारी अर पुलिस अधीक्षक न स्वागत कायी।
राष्ट्रपति न बदरी विशाला वेदपाठ अर खास पूजा कायी। बदरीनाथ मुख्य पुजारी रावल ईश्वर प्रसाद नंबूदीर अर तीर्थ पुरोहितौं न वैदिक मंत्रोच्चार क दगड़ विधि विधान से पूजा कर्यें।
मुख्यमंत्री न राष्ट्रपति थैं भोजपत्र मा बणि बदरीनाथ मंदिर क प्रतिकृति , आरती अर घर्या बण्यां समानु क कंडी भेंट कायी त मंदिर समिति अध्यक्ष अजेन्द्र अजय अर उपाध्यक्ष किशोर पंवार न राष्ट्रपति तै भगवान बदरी नाथ कु प्रसाद अर अंग वस्त्र भेंट कायी।
भू- बैंकुठ धाम तैं देखिक राष्ट्रपति बौत खुस दिख्येंणि छायीं। राष्ट्रपति न हत्थ हिलैं कि सबि श्रद्धालुऔं कु अभिवादन कायी।