एक अप्रैल बटि जादा ह्वै जालु बिजली कु बिल

देरादूण। बिजली उपभोक्तौं तैं अगिल साल एक अप्रैल बटि बिजली कु बिला दगड़ मा एडिशनल सिक्योरिटी कु पैसा बि देंण प्वाड़ळु। उत्तराखण्ड विद्युत नियामक आयोग न यु पैंसौं तैं 12 किस्तु म जमा करणा कु सुविधा देयाली।

यूपीसीएल क बिजली उपभोक्तौं पर एडिशनल सिक्योरिटी क 458.37 करोड़ रुप्या बच्यां छन। अर बिजली बिल क दगड़ एकदा यु पैंसो तैं जमा करणा मा दिक्कत हूंणि छायीं। यां खूंणि यूपीसीएल न नियामक आयोग म याचिका दायर कैकि यु पैंसौं तैं किस्तु क जमा करणा बारा मा बोलि छायीं।

आयोग क अध्यक्ष डीपी गैरोला सदस्य तकनीकी एम के जैन क पीठ न यीं रकम तैं 12 किस्तु मा जमा करणा खूंणि बोलि याली।
अब उपभोक्ता अगिल साल 1 अप्रैल बटि एडिशनल सिक्योरिटी कु पैंसों तैं जमा काराला। या रकम बिल मा जुड़िकि आली अर अलग लिख्यें जाली। जै से उपभोक्ता तैं पता चलि जालु कि कतगा पैसा जमा करणि।

पिछल साल मा उपभोक्ता न सालभर म कतगा बिजली खरच कायी। यांकु द्वी मैना कु औसत निकले जालु। मतलब कै न साल भर मा 12000 यूनिट बिजली खरच कायी, त औसत 200 यूनिट ह्वैग्यायी। अर बिजली कीमत 5 रुप्या यूनिट च त 10,000 रुप्यां एडिशनल सिक्योरिटी अमाउंट ह्वै जालु। या रकम 12 किस्तु मा जमा करण प्वाड़लि।

यांका अलाव विद्युत नियाम आयोग न एक अप्रैल बटि बिजली नै कीमत लागू करणा कु फैसला कै याली। इन्न मा बिजली उपभोक्तौं तैं एडिशनल सिक्योरिटी क दगड़ बिजली क नै कीमत बि देंण प्वाड़लि।