जमरानी बांध 2028 तक ह्वै जालु पूरू : सतपाल महाराज

देरादूण। कैबिनेट मंत्री सतपाल महाराजन बोलि कि जमरानी बांध परियोजना मार्च 2028 तक पूरि ह्वै जाली। महाराजन बोलि या उमेद च कि ऐसु वित्तीय बरस म बांध बणौंणा अर पुनर्वास कु काम सुुरू ह्वै जालु।

सतपाल महाराजन अपड़ा घार मा एक प्रेस वार्ता कायी वार्ता मा महाराजन बलि कि साल 1975 बटि लटकि जमरानी बांध परियोजना तैं केन्द्रीय सरकार बटि मंजूरि मिलणि बौत बड़ी बात च। उन्न बतै कि जमरानी बांध परियोजना म लगभग 1 लाख पचास हजार हेक्टर खेती क जमीन तैं सिचैं कु फैद मिललु। यां क दगड़ि हल्द्वानी अर वैका इन्नै-फुन्नै क तोक 42.70 मिलियन क्यूबिक मीटर पींणा पाणि लगभग साढ़े दस लाख लोगु तैं पींणा पाणि मिललु।

महाराजन बतै कि जमरानी बांध परियोजना से 63 मिलियन यूनिट बिजली बणलि। भारत सरकार न 1730.20 क मंजूरि पीएककेएसवाई म 90 प्रतिशत केन्द्र अर 10 प्रतिशत राज्य दियें जालु अर बाकि पैसा उत्तराखण्ड अर उत्तरप्रदेस सरकार एमओयू क अधार पर खरच काराला।

महाराजन बोलि कि उन्न उत्तर प्रदेसा मुख्यमंत्री योगी दगड़ि उत्तरप्रदेस तैं मिलण वलु 4879 क्यूसेक जादा पाणि तैं हरद्वार जिला क भगवानपुर तोक क 74 गौं क 18280 हेक्टयर खेति जमीन तैं सिचैं खूंणि 665 क्यूसेक पाणि देंणा क विनति कायी। अर ऐ बारा मा उत्तरप्रदेस अर उत्तराखण्ड क बीच मार्च क मैना मा संयुक्त निरीक्षण बि ह्वैग्यायी।