डोईवाला-दूधली सड़क चौड़ी करणा मांग, नीं ह्वै त्रिवेन्द्र सिंह रावत घोषणा पूरी

देरादूण। 3 साल बटि 7 किलोमीटर सड़क चौड़ी नी हूंण अर लोक निर्माण क काम करण तरीकौं पर सवाल खड़ा हूंणा छन। सड़क चौड़ी नीं हूंण पर गंवड्या (गांववासी) बौत दिक्कत मा छन। कम चौड़ी सड़क म खळखळ गाड़ी दनकणि छन, जै से रोज क्वीं न क्वीं दुर्घटना हूणिं च।

गंवड्यौ कु ब्वन च कि 3 साल पैलि पैल्यक मुख्यमंत्री त्रिवेन्द्र सिंह रावत न दूधली बटि डोईवाला तक 7 किलोमीटर सड़क तैं चौडु करणा क घोषणा कै छायीं। आज तीन साल बाद बि लोग निर्माण विभाग बजट नीं च बोलि कि लोगु तैं बखौंणु च।

सिमलास गौं क पैल्यक प्रधान न बोलि कि यीं सड़क फर इस्कुलयां नौन्यालु, बुढ़या अर लोग रोज दुर्घटना म घैल हूंणा छन अर विभाग आंखा बुजिकि सिय्यूं च, विभाग तैं कुछ नीं दिख्येंदु। उन्न बोलि बल अब विभाग सचेत नी ह्वै त हमतैं दुबरा आंदोलन करण प्वाड़लु।

बतै दियां बल सड़क चौड़ी करणा खूंणि गंवड़ियौं न कै बार आंदोलन कै। जैका बाद वे बगता मुख्यमंत्री त्रिवेन्द्र सिंह रावतन सड़क चौड़ी करणा क घोषणा कै छायीं।

वखि ऐ मामला मा लोक निर्माण विभागा अधिकारी सतीश कुमार ब्वना छन कि 19 करोड़ रुप्यौं कु बजट शासना क मंजूरी खूंणि भ्यज्यूं च। बजट मिलण फर सड़क चौड़ी करणा कु काम सुरू ह्वै जालु।

बतै दियां कि जब देरादूण मा विधानसभा सत्र सुरु हूंद त हरद्वार बटि देरादूण जाण वलि सबि गाड़ी दूधली क रस्ता हि देरादूण जन्दिन। सड़क कम चौड़ी हूंणा कारण बौत दिक्कत हूंद अर दुर्घटना हूंण कु खतरा सदनि बण्यूं रैंद।