उत्तराखण्ड मा तीन सालु म 3854 ब्यटुला अर 1134 नौनि हरचि, आरटीआई मा ऐ या बात समणि

देरादूण। ब्यटुलौं पर अत्याचार त आज न बल सदनि बटि हूंणा रैं। उत्तराखण्ड मा ब्यटुलौं कु गुम हूंणा एक खबर न आज सबि प्रदेसा रैवासियौं तै चंख (सर्तक) कै दे।

या खबर आरटीआई म समणि ऐ। सूचना अधिकार मा काशीपुर रैवासी नदीम उद्दीन न पुलिस मुख्यालय बटि सूचना मांगि छायीं।
सूचना मा बत्यें ग्यायी बल जनवरी 2021 बटि मई 2023 तक 3854 ब्यटुला अर 1134 नौनि हरचि छन। यीं मामला वु छन जु पुलिस विभाग म दर्ज छन। जैमा बटि अबि तक 2961 ब्यटुला अर 1042 नौनि मिलि ग्यीं।

जैमा साल 2021 म 1494, साल 2022 म 1632 अर साल 2023 मई तक 728 ब्यटुला छन। साल 2021 म 404, साल 2022 म 425 अर 2023 मई तक 305 नौनि सामिल हरचीं छन।

सूचना अधिकार मा जिला बार जु आंकड़ा छन वु छन नैनीताल जिला म 2021 म 168, साल 2022 म 165 अर 2023 मई तक 53, उधमसिंह नगर जिला म 343, 415, 183, पिथौरागढ़ जिला म 14, 18, 7, अल्मोड़ा जिला म 25, 44, 23, टिहरी जिला म 59, 49, 35, बागेश्वर जिला म 34, 26, 12, पौड़ी जिला म 43, 58, 19, उत्तरकाशी जिला में 34, 23, 15।

त वखि देहरादून जिला म साल 2021 म 364, साल 2022 म 430 अर 2023 मई तक 163 ब्यटुला, हरद्विार जिला म 339, 314 अर 169, चमोली जिला म 31, 26 अर 14, चम्पावत जिला म 23, 48 अर 25, रूद्रप्रयाग जिला म 14, 15 अर 10 ब्यटुलौं क हरचणा रिपोर्ट दर्ज हूयीं च।