साइबर ठगु निसाणा फर आईएएस मनीषा पंवार, अधार कार्ड अर मोबैल नम्बर फर बुक कायी पार्सल

देरारदूण। उत्तराखण्ड क आईएएस मनीषा पंवार क अधार कार्ड अर मोबैल नम्बर कु इस्तमाल कैकि साइबर ठगु न सब्यौं तैं चंक कै दे। बतै जाणु च आईएएस क नौ फर मुम्बई बटि मलेशिया खूंणि एक पार्सल बुक कर्ये ग्ये। आईएएस मनीषा पंवार तैं कोरियर कम्पनी कु फोन ऐ अर फोन करण वल न बोलि कि तुमर पार्सल मा अवैध समान च जै कारण बांद्रा पुलिसन मुकदमा दर्ज क याली।

ऐ मामला मा मनीषा पंवार न बोलि बल मिन क्वीं बि पार्सल मलेशिया खूंणि बुक नी कायी।

देरादूण एसपी सिटी सरिता डोभाल न बतै कि आईएएस मनीषा पंवार तैं मंगलवार खूंणि ब्लूडार्ट कोरियर बटि फोन ऐ। फोन करण वल न बोलि कि मुंबई बटि मलेशिया खूंणि जु पार्सल तुमन बुक कै छायीं वै तैं कस्टम विभागन पकड़ि याली अर तुम फर बांद्रा थाणा मा मुकदमा दर्ज कै याली। आईएएस तैं मुकदमा कु नम्बर 1045/0923 बत्यें ग्ये।

एसपी सिटी न बतै कि आईएएस क शकैत फर ध्वका देंणा कु मुकदमा दर्ज कै याली।
उत्तराखण्ड पुलिस न मुंबई म बांद्रा थाणा क इंस्पेक्टर संजय मराठे क दगड़ बात कायी त उन्न बोलि बांद्रा थाणा मा मनीषा पंवार फर क्वीं मुकदमा दर्ज नी ह्वै, उन्न बतै की मुकदमा दर्ज संख्या महाराष्ट्र पुलिस नी देन्दी। इन्न मा उत्तराखण्ड पुलिस तैं इन्न लगणु च कि यु साइबर ठगु कु काम च, पुलिस मामला मा जांच करणि च।