बागेश्वर उपचुनौ, कैथैं क्य मिलि?

बागेश्वर उपचुनौ मा भाजपा क प्रत्याशी पार्वती दास जीतिग्ये। पार्वती क जीत फर भाजपा बौत खुस च अर खुस बि किलै न हूंया बल कैबिनेट मंत्री स्व. चंदन राम दास क घरवलि न कांग्रेस बंसत कुमार तैं 2810 बोटु से हरै दे।

2810 बोटु क जीत तैं भाजपा अपणि ऐतिहासिक जीत बतौंणि च। सैद भाजपा या बिसरी ग्यें कि चन्दन राम दास चार बार बागेश्वर बटि विधायक रैं अर पिछल चुनौ मा उन्न कांग्रेसा उमैदवार तैं 12 हजार से जादा बोटु न हरै छायीं।

2022 विधानसभा मुख्य चुनौ मा बागेश्वर बटि भाजपा क उमैदवार चन्दनराम दास तैं 32211 बोट मिलि छायीं वखि दूसर नंबर पर कांग्रेसा रणजीत दास छायीं जौ तैं 20070 बोट मिला छायीं।

उपचुनौ मा भाजपा क पार्वती दास 32192 बोट मिलि अर कांग्रेस उमैदवार बसंत कुमार तैं 29382 बोट मिलि।

अब हम बात पिछल चुनौं क करदौं त कांग्रेस उमैदवार रणजीत दास तैं स्व. चन्दन राम दास न 12000 बोटु से हरै छायीं, वु कांग्रेस उमेदवार आज भाजपा कु झण्डा पकड़ि कि भाजपा म खड़ु हूंया छन।
इल्लै भाजपा तैं बौत बड़ी जीत मिलण चैंद छायीं पर इन्नु नीं ह्वै।

इन्न मा सवाल यों खडु हूंणू च की सिरफ 2810 बोटु से जीत, जै तैं भाजपा ऐतिहासिक बतौंणि च, वा ऐतिहासिक कन कैकि ह्वैग्यें।

बागेश्वर उपचुनौ म त ह्वै इन्न च बल कांग्रेस बोट प्रतिशत बढ़िग्ये अर भाजपा कु बोट प्रतिशत उतगै कु उतगै रै जतगा पैलि छायीं।
इन्न मा सवाल त यौ बि च भाजपा तैं कांग्रेस बटि अयां रणजीत दास क कुछ त बोट प्वड़यां हि होला। या बात हम इल्लै ब्वना छौं कि कैकि राजनेता कु अपडु कुछ त जनाधार त हूंदू हि च।

बागेश्वर उपचुनौ म भाजपा अर कांग्रेसा बीच म जीत कु अंतर कम ह्वैग्यें। इन्न मा या जीत ऐतिहासिक कन कैकि ह्वैग्यें। हां भाजपा इल्लै खुस ह्वै सकदन की उपचुनौ जीतिग्ये बस।

वखि क्षेत्रीय दल कु ठप्पा लग्यें कि घुुमण वलि पार्टी यूकेडी खूंणि बागेश्वर उपचुनौं आंखा ख्वलण कु चुनौ साबित ह्वै। नोटा फर बि यूकेडी से जादा बोट पड़िन। यूकेडी तैं अब या बात समझण चैंद कि चुनौ दप्तर मा बैट्ठी की नी जित्यें जांदा, चुनौ जितणा खूंणि लोगु से जुड़ण प्वाडदु, लोगु क बीच म जाण प्वाड़दु।

त वखि बागेश्वर उपचुनौ कांग्रेस खूंणि एक उमेदा द्वियूं जगौंण जन्नि च, कांग्रेस तैं स्वचण चैंद कि थ्वड़ा हौरि मेनत करदा त बागेश्वर उपचुनौ जीतै जै सकदु छायीं।

हाँ बागेश्वर उपचुनौ भाजपा अर कांग्रेस द्वियौं तैं एक सीख देंण चुनौ बि साबित ह्वै कि चुनौ मा जनता हि सब कुछ च अर उप चुनौ यीं बाति खूंणि बि खरबरदार करणु च की लोकसभा 2024 स चुनौ उत्तराखण्ड मा त कतै एक तरफि नीं हूंणा छन।