ब्यटुलौं न जेसीबी मसीन मा चैढिक कायी अतिक्रमण कु विरोध

रुद्रप्रयाग। तुंगनाथ घाटी मा कब्जा हटौंणा खूंणि पौंछि प्रशासन कु टोळा तैं लोगु क खास कैकि ब्यटुळौं कु खुब विरोध भुगतण प्वोड़ि ग्ये। इतगै न ब्यटुला जेसीबी पर चढ़ै कैकि कब्जा हटौंणा कु विरोध करण बैठिग्यींन। जैका बाद प्रशासन टीम तैं खाली हत्थ वापिस लौटण प्वाड़।

बतै दियां कि नैनीताल हाईकोर्ट कु आदेश क बाद आज बुवार खूंणि तहसील , पुलिस प्रशासन वन विभागा अधिकारी फोर्स व जेसीबी मसीन लैकेकि तुंगनाथ घाटी मा पौंछ्या छायीं। जन्नि प्रशासना कु टोळा अतिक्रमण हटौंणा खूंणि मक्कूबैंड पौंछी उन्नि वखक दुकानदार अर गाैं क ब्यटुलौं न अतिक्रमण हटौंणा कु विरोध कायी। गाैं वलु न वखिम धरना द्यायी अर प्रशासन क खिलाप खूब नारा बाजी कायी।

प्रशासन तरफा बटि द्वफरा मा जन्नि अतिक्रमण हटौंणा कु काम सुरू ह्वै। ब्यटुलौं न जेसीबी मसीन मा चैढ़िक विरोध सुरु कै दे। जेबीसी तैं ब्यटुलौं न चौछड़ि घेर दे जै से जेसीबी अगनै नी बढ़ि साकी।

गौ वलौं न बोलि कि एक तरफा सरकार तीर्थाटन अर रूजगार तैं बढ़ौंणा कु ढोल पिटणि च त दूसर तरफा सालु बटि अपडु़ रूजगार करणा वला लोगु क दुकान तोड़िक ऊंकु भवैष्य क दगड़ मा ठट्टा करणि च।

दुकानदारू व बोलि कि हम सरकार से रूजगार अर पर्यटन नीति बणौंण मांग करणा छा पर सरकार न अपडु गिच्चु बन्द कर्यूं च। उन्न बोलि चारधामा जातरा सालु बटि हूंणि च। अर आज यखक हक हकूकधारी कु रुजगार लुच्छी की यखक रैवासियों क दगड़ मा ध्वका कर्यें जाणु च। दुकानदारु न बोलि कि प्रदेस सरकार तैं हाईकोट मा तुंगनाथ घाटी क दुकानदार अर तरफ बटि ब्वन चैंद छायीं पर इन्नु नी ह्वै।

ऐ मामला मा एसडीएम जितेंद्र वर्मा न बोलि कि गौ वलों तैं तीन दिनकु बगत दियूं च। उन्न बोलि दुकानदार कोर्ट मा जै कि अपड़ि बात रखण चैंद या फिर तहसील मा ऐकी अपड़ि बात बतौंण चैंद।