डेंगू , प्राइवेट अस्पतालु जांच रिपोर्ट म खड़ा ह्वीं सवाल

देरादूण। उत्तराखण्ड मा अज्काल डेंगू कु डंक कन लोगु क जिकुड़ि धकध्याट करणि च। त वखि ऐ मामला मा प्राइवेट अस्पतालु जांच रिपोर्ट मा सवाल खड़ा हूंणा छन।

जख सरकरि अस्पतालु क रिपोर्ट मा प्लेटलेट्स 30 हजार से छन त प्राइवेट लैब रिपोर्ट 20 हजार से बि कम बतौंणि च। या बात एक न बल कतगै मामलु मा दिख्यें ग्यायी। सरकरि अस्पतालु अर निजी अस्पतालु पैथोलॉजी लैब क रिपोर्ट मा मरीजु प्लेटलेट्स बौत जादा कम बत्यें जाणि च। यीं बडु कारण च कि स्वास्थ्य विभागन अब प्राइवेट अस्पतालु म घपरोळ करण वलों क खिलाप कारवै करणा कु फैसला कै याली।

देरादूण मा डेंगू क मरीजु से अस्पताल भवर्यां छन। पर यांक बीच जा सबसे जादा धकधकि (चिंता) वलि बात जु समणि ऐवा च कि कुछ अस्पतालु म प्रशासान तरफ बटि रेंडम चेकिंग कर्ये ग्यायी त या बात समणि ऐ कि प्लेटलेट्स तैं लेकैकि जांच मा बौत बडु अंतर समणि ऐ। जै कारण प्रशासन कै अस्पतालु तैं नोटिस जारी कै याली।

ऐ मामला म स्वास्थ्य सचिव न जांच आदेश दे याली। उन्न नोटिस मा बोलि की एक तरफा सरकरि अस्पतालु मा मरीजु क प्लेटलेट्स 30 हजार तक छन त दूसर तरफ वै मरीजा प्लेटलेट्स निजी अस्तपाल जांच मा 20 हजार से कम बत्यें जाणा छन। यीं मामला मा स्वास्थ्य सचिव न अधिकारियौं क दगड़ मा बैठक कायी अर नै माइक्रो प्लान तय्यार कैकि डेंगू खूंणि नै बन्दबस्त करणा निर्देश दीं।