उत्तराखण्ड मा ह्वै नै “राष्ट्रवादी रीजनल पार्टी” कु गठन
देरादूण। उत्तराखण्ड मा एक नै राजनीतिक पार्टी बणिग्ये। जै तैं राष्ट्रवादी रीजनल पार्टी कु नौं दियेग्ये।
पार्टी संयोजक शिवप्रसाद सेमवालन बोलि कि पार्टी उत्तराखण्ड क निकाय चनौ म सबि सीटु म अपड़ा उमेदवार खड़ा कराली। उन्न प्रदेसा सबि पांचु लोकसभा सीटु म बि उमेदवार खड़ा करणा क घोषणा कै याली।
सेमवाल न बोलि कि ग्राम पंचैत चुनौ अबि बौत दूर छन पर पार्टी ग्राम पंचैतु मा बि अपड़ा उमेदवार खड़ा कराली।
त वखि सुलोचना ईष्टवाल न बोलि कि लगातार हूंण चुनौ मा भाजपा अर कांग्रेस क बाद नोटा तैं जादा बोट प्वड़णा छन, या से या बात साबित हूंद कि लोग क्षेत्रीय पार्टियौं पर भरोसु नी करणा छन।
राजेन्द्र पंत न बोलि हमतैं सबि क्षेत्रीय पार्टियौं अर जन संगठनु कु दगड़ु मिलणु च। उन्न बोलि जल्दी हि सबि जिलौं मा संगठन बण्यें जाला
यां से पैलि नै बणि राष्ट्रवादी रीजनल पार्टी क कार्यकर्ताओं न शहीद स्मारक मा जैकि भारत रत्न स्व. गोविन्द बल्लभ पंत तैं श्रद्धांजलि द्यायी।
पार्टीे क नौ क घोषणा क बाद बौत सर्या कार्यकर्ता पार्टी मा सामिल हूयीं।