फॉगिंग न डेंगु कु मच्छर म्वरदु नी च, बस कुछ बगत खूंणि अच्येत ह्वै जान्द
देरादूण। सर्या देरादूण डेंगू मच्छरा धपाक न (डंक) कराट करणु च। नगर निगम मच्छर म्वरणा क नौ फर रोज लाखौं रुप्या खरच करणु च।
अब एक खोज मा या बाद साबित ह्वै कि डेंगू कु मच्छर फॉगिंग से नी म्वरदु। डेंगू कु मच्छर मरणा खूंणि एंटी लार्वा जादा असरदार च। या बात मलेरिया अनुसंधान संस्थान न एक अध्ययन मा साबित ह्वै कि फॉगिंग न डेंगु कु मच्छर नी म्वरदु, यान मच्छर कुछ देर खूंणि अच्चेत (अचेत) ह्वै जान्द। फॉगिंग कु असर क्यूलेक्स मच्छर पर हि हूंद।
अध्ययन मा या बात साबित ह्वै कि फॉगिंग क जगा मा लेटेक्स, मेनेथॉल अर बॉरिक एसिड एडीजज फर जादा असर करदु। यु लार्वा तैं प्यूपा बणण स पैलि खतम कै दिन्द।
शोध मा या बात बि पता चलि की अगर अंडा, लार्वा मा नी बदलि अर तापमान घट जान्द त लार्वा उन्नि रैंद अर जन्नि तापमान बढ़दु , लार्वा प्यूपा मा बदलि ह्वैकि मच्छन बणि जान्द।
फॉगिंग दवै मत्थी मत्थी हि रै जान्द अर लार्वा तैं पूरि तरौं खतम नी करदि।
नगर आयुक्त मनुज गोयल न बतै कि फॉगिंग क जगा मा अब लार्वा साइडल बि छिड़कै जालु। उन्न बि या बात मानि कि फॉगिंग न मच्छर म्वरदु नी च बल कुछ बगत खूंणि अच्येत ह्वै जान्द।