अब सिविल सेवाओं क इमत्याना तय्यरि खूंणि भैर नी जाण प्वाड़ळु , दून विश्वविद्यालय मा होलि सुपर-39 कोचिंग

देरादूण। दून विश्वविद्यालय मा होलि सिविल सेवाओं क इमत्याना तय्यरि। सुपर-39 कोचिंग अक्टुबर बटि सुरू। यां खूंणि सुक्बार खूंणि सुर्वात ह्वैग्ये।

सुपर-39 कोचिंग खूंणि विश्वविद्यालय क वेबसाइट मा ऑनलैन रजिस्ट्रेशन होलु। 39 से जादा आवेदन आला त स्क्रीन टेस्ट क आधार पर चयन कर्यें जालु। यांक फीस अर रजिस्ट्रेशन क तारिख राजभवन क तरफ बटि कर्यें जाली।

दून विश्व विद्यालय क कुपति प्रो. सुरेखा डंगवाल न बतै कि राज्पाल ले. जनरल (सेनि) गुरमीत सिंह क निर्देश पर विवि मा सुपर -39 कोचिंग क सुर्वात हूंणि च। दून विवि, केन्द्र विश्वविद्यायल क दगड़ मिलिकि छात्रु कु मार्गदर्शन करालु। जु बि छात्र सिविल सेवा इमत्यान तय्यरि करण चाणा छन उ खूंणि विश्वविद्यालय इन्न महौल त्यार करणा कु काम करणु च। यख छात्रु तैं अपड़ि प्रतिज्ञा दिखौंणा कु मौका मिललु।

प्रयास आईएएस स्टडी सर्किल देरादूण निदेशक डॉ. सुशील कुमार न बतै कि सिविल सेवा इमत्यान क तय्यरि मा हूंण वलु बगत अर पैंसा क्वीं खरचा नी च, यु एक तरौं कु जमा पूंजी च अर यां कु फैदा जिन्दगि मा अगनै जै की मिललु। उन्न बोलि कि सिविल सेवा एक इमत्यान नी च, एक मिशन च, इन्न सोचिकि हमतैं तय्यरि करण चैंद।

ऐ मौका फर उप कुलसचिव नरेंद्र लाल, डॉ. सविता कर्नाटक, डॉ. अरुण कुमार, डॉ. राशी मिश्रा, डॉ. राजेश भट्ट, डॉ. राहुल सक्सेना, डॉ. राकेश भट्ट छायीं।