आंखौ क बिमरि ‘आई फ्लू’

आई फ्लू आंखौ मा हूंण वलि एक बिमारि च, जु गंदगी, बरखा क कारण से जादा फैल्दू। आई फ्लू मा आंखा लाल ह्वै जन्दन, आंखौं मा पिड़ा हून्द, आंखि उस्यें जन्दन।

बस्गाल म जादा बरखा, बाढ़ अर पाणि भ्वरणा से शहरु मा आई फ्लू तेजी से बढ़दै जांद। ऐ मौसम मा आई फ्लू क फैलणा कु खतरा जादा ह्वै जान्द। इन्न मा जब हमर आंखा लाल, आंखौं मा खज्जि अर पिड़ा ह्वै त हमथैं सबसे पैलि डॉक्टर मा जाण चैन्द।

आई फ्लू तैं कंजक्टिवाइटिस अर पींक आई क नौं से जण्यें जान्द। दूसर शब्दु मा ऐ तैं ‘आंखा औणा’ बि ब्वलें जान्द। आई फ्लू आंखौं क बिमरि च, यामा आंखा लाल, आंखौं मा पिड़ा, अर आंखा उस्यें जन्दन।

‘आंखा औणा’ फर हमथैं दिनमा एखारि-एखारि अपड़ा हत्थु तैं साबुणन धूण चैंद। आंखौं मा दवै डलणा क बाद जरूर हत्थ धूण चैंदन।

‘आंखा औणा’ फर आंखौं मा खज्जि हून्द, इन्न मा एखारि एखारि हत्थ आंखौं मा जांद, इन्नु हमतैं कतै नीं करण चैंद किलैकि आंखौं तैं एखारि-एखारि हत्थ लगौंण अर रगोड़न से आई फ्लू फैळणा कु खतरा औरि जादा ह्वै जान्द।

अपडु समान जन्न तौलिया, रुमाळ, चश्मा कैथैं बि इस्तमाल खूंणि कतै नीं देंण चैंद। यख तक कि एक घार मा द्वी जनौं क आंखा अयां छन त हमतैं आई ड्रॉप बि द्वी रखण चैंदन।

आंखा औण फर सदनि चश्मा लग्यें कि रखण चैंद। यां से आंखा धूळ अर माटु से बच्यां रैंदन अर आई फ्लू जादा नीं फैलदू।

‘आंखा आण’ म हमथैं आंखौं क गरम अर ठंडु सिकै करण चैंद। गरम पाणिम भिग्यूं साफ कपड़ा या बरफ मा लिप्टयूं कपड़ा आंखौं मा रखण चैंद। आई फ्लू म नजर कु चश्मा नीं लगाण चैंद, हमथैं कालु रंगा कु चश्मा लगौंण चैंद।

‘आंखा आण’ फर ब्यटुळौं तैं आई मेकअप नीं करण चैंद यां से दुबरा आई फ्लू हूंणा खतरा बढ़ि जान्द। ‘आंखा आण’ फर घौर बटि भैर नीं जाण चैंद अर आंखौं मा गुलाब जल डळण चैंद या से आई फ्लू फैळणा कु खतरा कम ह्वै जान्द।

आई फ्लू तैं रवक्णा खूंणि हमतैं थाडे़ (सार्वजनिक) जगों म नीं जाण चैंद अर जादा से जादा अपड़ा घार म हि रैंण चैंद। आई फ्लू मा हमतैं टीवी, मोबाइल, अर कम्प्यूटर कु इस्तमाल कम करण चैंद।

आई फ्लू मा खाण पिणा कु खास ध्यान देंण चैंद। हमतैं पौष्टिक खाणु खाण चैंद, जै से शरैल इम्यूनिटी औरि कटकुटु ह्वै सक्यां। आंखौं खूंणि गाजर अर पालक बौत अच्छु हून्द, इल्लै हमतैं गाजर अर पालक खाण चैंद।