धामी क हत्थ कटकुटु करणा खूंणि थामी भाजपा कु झण्डा : रंजीत दास

देरादूण। कांग्रेसा रंजीत दास न भाजपा कु झण्डा थामी याली। रंजीत दास विधानसभा चुनौं मा बागेश्वर बटि कांग्रेसा उमेदवार छायीं। रंजीत दासा भाजपा मा शामिल हूंण फर कांग्रेस तैं बागेश्वर उपचुनौं से पैलि बडु झटका लगिग्यें।

वखि रंजीत दास न बोलि बल वु मुख्यमंत्री धामी क काम से बौत खुस छन।

रंजीत दास बोलि कि धामी अर वु द्विया एक दगड़ पढ़ै करदा छायीं। उन्न बोलि कि मुख्यमंत्री धामी से मि तब बि बौत जादा प्रभावित छायीं अर आज बि छौं। उन्न बोलि बल धामीन नकल माफियौं खूंणि कटकुटु कानून बण्यें अर दूर जिलौं क विकास खूंणि मु काम करिन, वां से मि बौत खुस छौं। उन्न बोलि मि 6, 7 मैना बटि धामी क तारिफ करणु छौं अर अब मिन धामी हत्थु तैं कटकुटु करणा खूंणि भाजपा कु झण्डा थामी।