राजस्व बढ़ौंणा खूंणि सबि विभाग खळाखळ काम कर्या : मुख्यमंत्री धामी
देरादूण। मुख्यमंत्री धामीन सचिवालय मा राजस्व प्राप्ति क बारा उर्यीं बैठक मा बोल कि सबि विभाग राजस्व बढ़ौंणा खूंणि इनोवेटिव कोसिस कर्यां अर यां खूंणि ऑनलैन काम करणा दिसा मा खास ध्यान दियें ज्यां।
मुख्यमंत्री धामी न बोलि कि राजस्व वसूलणा खूंणि रोजना यीं बातिक पता कर्यें ज्यां कि विभागु की करि वसूली क डाटा अर राजस्व परिषद मा राजस्व वसूली क डाटौं मा जु फरक दिख्येंणु च, वैंकु दिकदरि कु समाधान कर्यें ज्यां।
मुख्यमंत्री न सबि जिलाधिकारियौं तैं बोलि कि राजस्व वसूली क कारवै मा तेजी कर्यें ज्यां। यां खूंणि जनपदु मा बणि समिति क बैठक कर्यें ज्यां। उन्न बोलि कि देरादूण, हरद्वार, उधमसिंहनगर अर नैनीताल जनपदु मा राजस्व वसूली मा और तेजी ल्याणा जरूरत च। मुख्यमंत्री न बोलि कि यूपीसीएल अर यूजेवीएनएल तैं राजस्व बढ़ौंणा क दिसा मा खास कोसिसा जरुरत च। उन्न बोलि कि जख-जख बिजली क चोरि हूंणि च वख लगातार नजर रख्यें ज्यां अर उच्च औद्योगिक मांग वलि तोक मा बिलिंग कु काम तैं बढ़ौंणा क तरफा खास ध्यान दियें ज्यां।
मुख्यमंत्री न बोलि कि हमरि संपदाऔं तैं अच्छु तरौं खप्यौंणा खूंणि सैंणा तोक मा कमर्शियल प्लांटेशन क दिसा मा तेजी से काम कर्यें ज्यां।
मुख्यमंत्री न बैठक मा अधिकारियौं तैं निर्देश दीं कि पिछल सालु क बची वसूली मा औरि तेजी ल्याणा जरूरत च। उन्न परिवहन, खनन, जीएसटी क तोक मा नजर रखणा खूंणि ऑनलैन सिस्टम तैं औरि कटकुटु बणौंण क निर्देश दीं।
मुख्यमंत्री न बोलि कि बाढ़ क समस्या मा बचाब खूंणि सिचैं विभागा जरिया ठोस नीति बण्यें ज्यां। मुख्यमंत्री अधिकारियौं तैं निर्देश दीं कि पाड़ मा उद्योग लगौंणा दिसा मा कोसिस कर्यें ज्यां।
बैठक मा कैबिनेट मंत्री प्रेम चंद अग्रवाल, मुख्य सचिव डॉ. एस.एस. संधू, अपर मुख्य सचिव श्रीमती राधा रतूड़ी, प्रमुख सचिव आर. के. सुधांशु, सचिव आर. मीनाक्षी सुंदरम, दिलीप जावलकर, अरविन्द सिंह ह्यांकी छायीं।