मणिपुरा घटना क विरोध मा सामाजिक संगठनौं न मानव श्रंखला बण्यें अर बोलि घटना मानव मूल्यों मा खळाखळ आणि गिरावट कु नतीजा च

देरादूण। मणिपुर मा द्वी ब्यटुळौं तैं नंगी कैकि सड़कियौं मा घुमयें अर ये मामला केन्द्र सरकार कु बन्द गिच्चा क खिलाप आज इत्वार खूंणि देरादूण मा जन संगठनौं मानव श्रंखला बण्यें की विरोध कायी।

आज सुबेर प्रदेसा लगभग द्वी दर्जन संगठनु का ळोग गांधीपार्क मा जमा हूयीं। जनगीत अर मणिपुर फर लिखि कविता से कार्यक्रमा सुरु ह्वै। यांका बाद राजपुर रोड बटि घंटाघर अर घंटाघर बटि वापिस एस्लेहॉल तक मानव श्रंखला बण्यें ग्यायी। मानव श्रंखला मा ळोगु मणिपुरा सरकार तैं बर्खास्त करणा अर प्रधानमंत्री मंत्री अर गृहमंत्री इस्तीफा दो क मांग करणा छायीं।

मानव श्रंखला क बाद दुबार सबि गांधी पार्क मा जमा हूयीं। जख मा एक प्रस्ताव पढ़िकि सुण्यें ग्यायी, अर आन्दोलन तैं अगनै बढ़ौंणा क संकल्प लियेग्यें। उत्तराखण्ड महिला मंच अर उत्तराखण्ड इंसानियत मंच द्वीयौं न आन्दोलन तैं अगनै रणनीति बणौंणा बात बोलि।

प्रस्ताव मा ब्वलें ग्यायी की मणिपुर घटना मानव मूल्यों मा खळाखळ आणि गिरावट कु नतीजा च। यु ब्यटुळौं कु सम्मान अर बेटी बचाओ का ख्वखला नारों क बि मखौल च।

घटना 4 मई खूंण ह्वै अर ऐ बारा मा रिपोर्ट बि दर्ज ह्वै। इतगा बड़ी घटना ह्वै, इन्ना मा घटना क जाणकारि बड़ा अधिकारियौं तक जरुर पौंछयें होलि। साफ च कि या जाणकारि मणिपुर सरकार अर दिल्ली मा बैट्ठयां प्रधानमंत्री अर गृहमंत्री तक पौंछि होलि। 18 जुलै खूंणि वीडिया वायरल हूंणा बाद आरोपि पकड़े ग्यींन। प्रस्ताव मा ब्वलें ग्यें कि यां से साफ च मणिपुरा सरकारन घटना तैं लुकौंणा कु काम कायीं। प्रस्ताव मा मांग कर्यें ग्यायी कि जतगा बि दोषि छन ऊतैं जेल अर मणिपुरा मुख्यमंत्री एन बीरेन सिंगा इस्तीफा क मांग कर्यें ग्यायी अर राष्ट्रपति से विनति कर्यें ग्यायी कि मणिपुरा सरकार तैं झट बर्खास्त कर्यें ज्यां।

मानव श्रंखला मा उत्तराखण्ड महिला मंच, उत्तराखण्ड इंसानियत मंच, सर्वोदय मंडल जनवादी महिला समिति, स्त्री मुक्ति लीग, उत्तराखण्ड जन जाति कल्याण समिति, रंग कल्याण संस्था, जोहार क्लब, नुमाइंदा ग्रुप ऑफ उत्तराखण्ड, भारत की नौजवान सभा, चेतना आंदोलन , सर्वोदय मंडल , सीटू , अखिल भारतीय किसान सभा, एसएफआई , भारत विज्ञान-विज्ञान समिति, एनएपीएसआर, जनसंवाद समिति, सिख वेलफयेयर सोसायटी, विकल्प , उत्तराखण्ड अगेंस्ट करप्शन, मसीह समाज, संवेदना , उत्तराखण्ड पीपुल्स फोरम न भाग ल्यायी।