सरकारि इस्कुळु मा पढ़यें जालु उत्तराखण्ड राज्य आन्दोलन कु इतिहास

देरादूण। प्रदेसा सबि सरकरि इस्कुळु मा अब प्रदेसा त्योवार, कोथिग क बारा मा पढै जाणा क दगड़ा-दगड़ि उत्तराखण्ड राज्य आन्दोलन कु इतिहास बि पढै़ जालु।

शिक्षा मंत्री डॉ. धन सिंह रावता निर्देश फर ‘विरासत’ नाैं क किताब त्यार कर्यें जाणि च। यां खूंणि सबि जिला शिक्षा एवं प्रशिक्षण संस्थानु बटि जाणकारि मगें ग्यायी। शिक्षा मंत्री न बतै कि इस्कुळयां नौन्याळु तैं दूद बोलि भाषा मा जाणकरि दियें जाणि च अर ऊतैं गढ़वळि, कुमौंनि अर जौनसारी मा पढ़यें जाणु च।

एससीईआरटी क तरफ बटि कक्षा तीन तकाक बच्चौं खूंणि किताब त्यार कर्यें ग्यें अर माध्यमिक कक्षा क बच्चौं तैं प्रदेसा इतिहास, भूगोल, रीति रिवाज, बार त्योवार, म्याळ अर राज्य आन्दोलन कु इतिहास, स्वतंत्रता संग्राम मा भाग लिंण वळा प्रदेसा ळोगु क बारा मा पढ़यें जालु। उन्न बोलि किताब त्यार कर्यें जाणि च। प्रदेसा सबि डायट ऐ बारा मा किताब त्यार कैकि एससीईआरटी तैं द्याला। शिक्षा मंत्री न बोलि यीं किताब तैं कक्षा पांच बटि 12 तकाक इस्कुळयां नौन्याळु तैं पढ़यें जालु।