जिन्दगि मा मेनत कु क्वीं विकल्प नीं हूंदू : मुख्यमंत्री धामी

देरादूण। मुख्यमंत्री धामीन आज शुक्रबार खूंणि आईआरडीटी सभागार मा 10 अर 12 क इमत्यान मा पास हूंया छात्र छात्राऔं कु सम्मान मा उर्यूं कार्यक्रम मा भाग ल्यायी।

ऐ कार्यक्रम मा मुख्यमंत्री न प्रदेस सरकार क तरफ बटि 94 छात्रु तैं सम्मानित कायी। मुख्यमंत्रीन बोलि कि आज मितैं गर्व हूंणू च कि आज वु प्रदेस क उ नौन्याळु तैं मिलणा छन जौन अपड़ि प्रतिभा क बल फर यु दिख्यें कि टुक्कु (शिखर) मा जाणा खूंणि उद्देश्य साफ हूंण चैंद। मुख्यमंत्री न बोलि कि जिन्दगि मा मेनत कु क्वीं विकल्प नीं हूंदू। शिक्षा से जीवन मा सबि चुनौति कु सामना कर्यें जै सकदु। उन्न छात्रु तैं बोलि कि या जिन्दगि क पैळि सीढी़ च अर जिन्दगि मा सीढ़ी चढ़दा-चढ़दा तुमथैं सबि सीढ़ि मा चुनौति मिललि, जै तैं तुमथैं अपड़ु विवेक अर दिमाग क तागत से पार करण प्वाड़ळु।

मुख्यमंत्री न बोलि कि प्रश्न पत्रा जरिया जीवन मा सदनि इमत्यान नीं हूंद। कै बार इनि चुनौति अन्दिन जौ कु समाधान अपड़ि पूरा तागत लग्यें कि ह्वै सकदु। उन्न बोलि काम करणु कु मौका जै बि तोक मा मिल्यां वैथैं अगनै रैकि पूरू कर्यां।

मुख्यमंत्री न बोलि कि उत्तराखण्ड देस कु पैलु प्रदेस च जै मा स्कूली शिक्षा मा नै शिक्षा नीति लागू कर्यें ग्यें। शिक्षा मंत्री डॉ. धन सिंह रावत न बोलि कि शिक्षा क तोक मा गुणात्मक सुधार खूंणि प्रदेस मा तेजी से कोसिस हूंणि च। उन्न बोलि कि देसा की रैंकिंग मा हमरा 5 विश्वविद्यालय छन। उन्न बतै कि ऐसु क साल एनडीए अर सीडीएस मा प्रदेस क सबसे जादा नौना पास हूंयीं। उन्न बोलि कि पैळि बार मेधावी छात्रु तैं मुख्यमंत्रीन सम्मानित कायी। उन्न बोलि कि सरकार छात्रु क अच्छु भवैष्य खूंणि लगातार काम करणि च।

ऐ मौका फर शिक्षा महानिदेशक बंशीधर तिवारी, अमर उजाला के सलाहकार सम्पादक उदय सिन्हा, अमर उजाला क स्थानीय सम्पादक दयाशंकर शुक्ल, कुलपति छायीं।