लोक निर्माण मंत्री महाराजन मालन मा टूट्यूं पुळ कु निरीक्षण कायी

कोटद्वार: प्रदेसा लोक निर्माण, सिंचाई, लघु सिंचाई, पर्यटन, पंचायती राज, ग्रामीण निर्माण, जलागम प्रबन्धन, धर्मस्व एवं संस्कृति मंत्री सतपाल महाराज न कोटद्वारा मालन मा टूट्यां पुळ कु निरीक्षण कायी।

महाराजन बदरीनाथ रोड मा उत्तरप्रदेसा मुख्यमंत्री योगी आदित्य नाथ के खास कार्याधिकारी राजभूषण सिंह रावत क बुबा तैं ऊंका घौर मा जैकि श्रद्धांजलि द्यायी।

महाराजन विभागीय अधिकारियौं तैं निर्देश दीं कि मालन नदी मा काम चलावु रस्ता (सहपथ, डायवर्जन) कु काम बौत तेजी से कर्यें ज्यां अर अर बोलि कि यु काम 4 अगस्त तक पूरु कर्यें ज्यां।

सतपाल महाराजन बोलि कि गदनौं तैं एक दुसरा दगड़ मा ज्वड़णा खूंणि पूरी योजना बणें कि हाईकोर्ट मा जाळा। उन्न बोलि कि प्रदेस बौत बरखा ह्वै यां से पुळु तैं नुकसान ह्वै।

महाराजन बोलि कि उन्न अधिकारियौं तैं निर्देश पैळि दियां छन कि जु बि सड़क बन्द हून्द, वीं सड़कि फर दूसर रस्ता ख्वलें ज्यां। उन्न बोलि कि बस्गाल मा बन्द हूयीं सड़कियौं तैं झट से ख्वलणा कु जिम्मेबरि तय कर्यें ज्यां।