तीर्थपुरोहितौं न कायी केदारनाथ मंदिर क टुक्टु से ऊंचा बणणु कूड़ौं (मकान) कु विरोध

रुद्रप्रयाग। केदारधाम मा तीर्थ पुरोहितौंन केदारनाथ धाम मा केदारनाथ मंदिर क टुक्टु बटि ऊंचा बणणा कूड़ौं (मकान) क विरोध कायी। तीर्थ पुरोहितौं न बोलि कि धाम मा मंदिर क टुक्टु से ऊंचा कूड़ि नीं बणण चैंद। उन्न बोलि कि आज तक धाम का क्वीं बि कुड़ि मंदिरा टुक्टु से जादा ऊंची नीं बणि। तीर्थ पुरोहितौं न झटा से इन्न बणण कुड़ौं कु काम तैं रवक्णा कु मांग कायी। अर बोलि कि बल काम नीं रव्कें ग्यें त आन्दोलन कर्यें जालु।

2013 क आपदा क बाद केदारधाम का दुसर चरणा कु काम सुरु ह्वै त धाम मा अस्पताल, अर प्रशासनिक कुड़ा बण्यें जाणा क काम हूंणा छन। इन्न मा धाम मा तीर्थ पुरोहित यु आरोप लगौंणा छन कि केदारधाम मा कै नै कुड़ा केदारबाबा क मंदिर क टुक्कु बटि औरि ऊंचा बण्यें जाणा छन। उन्न बोलि कि केदारधाम मा आज तक भगवान केदारा मंदिर क टुक्कु बटि ऊंचा नीं बण्यां। उन्न बोलि कि आपदा से पैलि बि केदारधाम मा क्वीं बि घौर मंदिरा टुक्कु बटि ऊंचा नीं बण्यां छायीं।

केदारनाथ धाम मा बड़ी तीर्थ पुरोहित उमेश चन्द्र पोस्ती न बोलि बल मुख्यमंत्री से लेकर जिलाधिकारी तैं बतै याली कि मंदिरा ठीक समणि तुपुरु (तीसरी मंजिल) कुडु बणणु च जु मंदिर क टुक्कु से मत्थी जाणु च। उन्न बोलि कि मंदिर से मत्थी जाणि कुड़ि कु काम रव्कें जाण चैंद। उन्न बोलि कि अगर यु काम नीं रव्कें ग्यें त तीर्थ पुरोहित आंदोलन कारळा।