मुख्यमंत्री न कारगिल शहीदु तैं द्यायी श्रद्धांजलि

देरादूण। मुख्यमंत्री धामी न आज कारगिल विजय दिवस फर गांधी पार्क का उर्यूं कार्यक्रम मा शहीदु तैं श्रद्धांजलि द्यायी अर शहीदु क कुटुम्दरि तैं सम्मानित कायी। ऐ मौका फर मुख्यमंत्री घोषणा कायी कि देरादूण अर पिथौरागढ़ मा एक औरि सैनिक कल्याण कु दप्तर ख्वलें जालु। मुख्यमंत्री न बोलि कि अब प्रदेस मा सैनिक द्वार अर स्मारकौं की देखभाळ सैनिक कल्याण विभाग अर जिला प्रशासन काराळु। मुख्यमंत्री न बोलि कि भारतीय ज्वानु न कारगिल लड़ै मा जन्नि वीरता कु काम कायी अर घुसपैठियों तैं अपड़ि केर बटि भग्गे दे, वै से सर्या दुन्या तैं हमरि सेना क तागत कु पता चलिग्यें।

मुख्यमंत्री न बोलि कि प्रधानमंत्री क कोसिसन आज हमरि सेना पैळि से जादा तागतदार बणणि च बल वैकु यश अर कीर्ति औरि जादा बढ़णि च।

उन्न बोलि सरकार जख सेना तैं नै तरिकौंन त्यार करण च, त वखि ज्वानु अर वुकी कुटुम्दरि तैं मिलण वळि सुविधौं तैं औरि बढ़ौंणि च। मुख्यमंत्री न बोलि कि राज्य सरकार पैल्यक सैनिक, शहीद सैनिकु क आश्रितौं क भलै खूंणि काम करणि च। शहीदु क कुटुम्ब बटि एक जना तैं वैकीं पढ़ै अनुसार नौकरि दियें जाणि च।
मुख्यमंत्री न बोलि कि देरादूण मा गुनियाल गौं मा शहीदु क समळोण मा सैन्य धाम बणौंणा कु काम हूंणू च।

उत्तरखण्ड सरकार लड़ै मा शहीद हूंया ज्वानु घरवळि अर अपंग सैनिकौं तैं 2 लाख रुप्यौं क मकान खूंणि मदत करणि च।

ऐ मौका फर सैनिक कल्याण मंत्री गणेश जोशी, विधायक खजान दास, श्रीमती सविता कपूर, मेयर सुनील उनियाल गामा, भाजपा महानगर अध्यक्ष सिद्धार्थ अग्रवाल, अनिल गोयल, पैल्यक सैन्य अधिकारी मेजर जनरल शम्मी सभरवाल, मेजर जनरल देवेश अग्निहोत्री बि छायीं।