लोक तिवार हरेला सुख, जस, शान्ति अर पर्यावरण तैं बचौंणा कु त्यार च : मुख्यमंत्री धामी

देरादूण। मुख्यमंत्री धामीन न इत्वार खूंणि हरेला त्योवार क मौका फर ‘जल संरक्षण अर जल धाराओं के पुर्नजीवन’ थीम फर उर्यूं कार्यक्रम मा भाग ल्यायी।

ऐ मौका फर मुख्यमंत्री डाळु बि लग्यें। मुख्यमंत्री न प्रदेसा रैवासियों तैं लोक तिवार हरेला क बधै द्यायी अर बोलि लोक तिबार हरेला सुख, जस, शान्ति अर पर्यावरण तैं बचौंणा कु त्यार च।

मुख्यमंत्री न बोलि हरेला इन्न त्योवार च, जु हमतैं प्राकृतिक क नजीक लिजांद। मुख्यमंत्री न बोलि हमतैं या सौं लिंण प्वाड़लि कि हम प्राकृतिक अर विरासत तैं बच्यें की आण वलि पीढ़ि तैं स्वच्छ पर्यावरण द्युला। उन्न बोलि कि ऐसु क साल लोक पर्व क थीम जल संरक्षण एवं जल धाराओं का बचौंण फर च। उन्न सबि से पाणि बचौंणा क दिसा मा अपडु सहयोग देंणा क विनति कायी।

वन मंत्री सुबोध उनियाल न बोलि कि लोक पर्व हरेला मा ऐसु क साल 8 लाख डाळा लगौंणा कु लक्ष्य च। यु काम 15 अगस्त तक होलु। उन्न बोलि डाळा लगौंणा क दगड़ मा डाळों तैं बचौंणा पर खास ध्यान दियें जालु। उन्न सबि प्रदेसा रैवासियांें से विनति कायी कि पर्यावरण बचौंणा खूंणि हम सब्यौं तैं एक ह्वैकैकि काम करण प्वाड़ळु। उन्न बोलि कि डाळु लगें कि फोटा खिंचिकि सोशल मीडिया मा डल्यां, जै से हम अपड़ि आण वलि पीढ़ि तैं यु बतै सक्यां कि हमन पर्यावरण तैं बचौंणा खूंणि क्या काम कायी।

ऐ मौका फर सांसद माला राज्यलक्ष्मी शाह, विधायक उमेश शर्मा काऊ, मेयर सुनील उनियाल गामा, प्रमुख सचिव आर.के सुधांशु, प्रमुख वन संरक्षक (हॉफ) अनूप मलिक अर वन विभाग क बड़ा अधिकारी छायी।