वाह रे कृषि मंत्री, प्रदेसा मा काजू क प्रोसेसिंग इकाई लगळि पर बाबुगोश कु क्या ह्वोळु : हरीश रावत

देरादूण। गोवा क काजू जिमदारु क पिड़ा देखिक गणेश जोशी क ज्यू मा इतगा पिड़ा ह्वै कि उन्न उत्तराखण्ड मा काजू प्रोसेसिंग इकाई लगौंणा कु फैसळा कै याली। या अच्छी बात च। गणेश जोशी क ऐ फैसळा फर हरीश रावतन ऊथैं सोशल मीडिया मा कचोरि अर बोलि – वाह माननीय कृषि अर उद्यान मंत्री गणेश जोशी जी, अब तुम गोवा बटि काजू लेकैकि वैंकी प्रोसेसिंग इकाई उत्तराखण्ड मा लगौंणा छन, तु तुमरु ब्वन च।

हरीश रावतन बोलि कि हमन रुद्रपुर मंडी मा मरसु, क्वादु अर झुंगरा क प्रोसेसिंग यूनिट लग्यें छायीं, जैथें तुमरि सरकारन बंद कै याली। हमरु बी ग्रेट अर सी ग्रेट कु सेब बजार मा नी बिकणु च। बाबूगोशा बगड़, देवाल बटि खाल गरुड़ घाटी तक, जख बि जैला त हजारु टन बाबूगोश सड़कियूूं मा प्वड़णु मिललु, वै थैं क्वीं कीमत नीं मिलणि च अर तुमथैं यां खूंणि प्रोसेसिंग इकाई लगौंणा क याद नीं ऐ। पर गोवा क काजू क जिमदारु क पिड़ा देखिकि तुमथैं इतगा अकुलाट ह्वैग्यें कि तुमन उत्तराखण्ड म काजू क प्रोसेसिंग इकाई लगौंणा क फैसळा कै याली, या बौत अच्छी बात च।