केदारनाथ आपदा क 10 साल पूरा हूंण फर केदारधाम मा पौंच्यींन मुख्यमंत्री धामी

रुद्रप्रयागः मुख्यमंत्री धामी केदारनाथ आपदा क 10 साल पूरा हूंण पर आज श्री केदारनाथ धाम मा पौंच्यींन। मुख्यमंत्रीन बाबा केदारनाथ क दर्शन करिन अर देस, प्रदेस जस अर सब्यौं क सुखि सन्ति क कामना भगवान से कायी।

मुख्यमंत्री पुष्कर सिंह धामी न ऐ मौका फर केदानाथ आपदा मा टुणपट हूयां ळोगुक शांति खूंणि हवन कायी। मुख्यमंत्री न बाबा केदारा दर्शन करिन अर केदारधाम मा हूंणा सबि निर्माणा कामु तैं देखि। उन्न केदारधाम मा चलणा कामु तैं ऐसु क साळ आखिर तक पूरु करणा खूंणि बोलि।

मुख्यमंत्री धामीन बोलि क आज 10 साल पैलि केदारनाथ धाम आयी, आपदा मा सबि कुछ खतम ह्वैग्ये छायीं। उन्न बोलि कि प्रधानमंत्री मोदी बाबा केदार क बड़ा भक्त छन। बाबा क कृपा अर प्रधानमंत्री क इच्छाशक्ति न सर्या केदारपुरी तैं भव्य बण्यें जाणु च। मुख्यमंत्रीन प्रधानमंत्री कु आभार बोलि अर बाबा केदार बटि ऊंकी राजि खुसी क कामना कायी।

मुख्यमंत्री न केदारधामा मा काम करणा भुरत्यौं (मजदूर) क दगड़ मा छ्वीं लग्येन अर ऊंका हालचाल पुछिन। उन्न अधिकारियौं तैं निर्देश दीं क भुरत्यौं कु खास ध्यान रख्यें ज्यां अर बोलि वुथैं क्वीं बि दिकदरि नीं हूंण चैंद।

ऐ मौका फर बद्रीनाथ केदारनाथ समिति क अध्यक्ष अजेंद्र अजय, जिला पंचायत अध्यक्ष अमरदेई शाह, जिला अध्यक्ष भाजपा महावीर पवार, सचिव विनय शंकर पांडे, पुलिस अधीक्षक विशाखा अशोक भदाणे, अपर मुख्य कार्याधिकारी बद्री केदार मंदिर समिति योगेंद्र सिंह अर भक्तगण छायीं।