महौल खराब कै त ह्वोळु मा मुकदमा : एसएसपी देरादूण

देरादूण। पुरोला महापंचैत क बाद देरादूण मा बि मुसलमानु न महापंचैत उर्याणु कु फैसला कायी। जैका बाद देरादूण पुलिस चंक ह्वैग्यें अर प्रदेस मा पुलिस बन्दबस्त खराब नीं हूयां या खूंणि देरादूण क एसएसपी न बोलि जु बि महौल खराब करणा क कोसिस कराळु वै फिर एनएसए ( राष्ट्रीय सुरक्षा काननू ) लग्यें जालु। एसएसपी न ळोगु तैं चितै कि कानून क दगड़ मा क्वीं छेड़ि नीं कर्या, पुलिस सखत कारवै खूंणि त्यार च।

बतै दियां कि पुरोला उत्तरकाशी मा हिन्दु संगठनु क महापंचैत का बाद मुस्लिम सेवा संगठन क तरफि बटि 18 जून खूंणि देरादूण मा महापंचैत उर्याण कु फैसळा कायी। संगठन अपड़ि बात फर अडिग च अर दुसर तरफा पुरोला मा महापंचैत उर्याणु खूंणि प्रशासन न अपड़ि मंजूरि नी दे।

देरादूण मा महापंचैत तैं लेकैकि देरादूण एसएसपी दलीप सिंह कुंवर न बोलि कि क्वीं बि कानून त्वड़ण क कोसिस कारळु वैं फर कारवै कर्यें जाली।

एसएसपी न बतै कि मुसलमानु न बधुबार खूंणि भानियावाला मा महापंचैत उर्यीं छायीं। यांका बाद पुलिस न महापंचैत उर्यांण वळों क दगड़ मा बात कायी अर बतै कि क्वीं बि कानून तैं त्वड़णा क कोसिस कारळु वै फर सखत कारवै कर्यें जाली।
उन्न बोलि कि यांक बाद महापंचैत उर्याण वळों न महापंचैत नीं करणु कु फैसळा कै याली।